ជំនន់ទឹកភ្លៀង នៅខេត្តព្រះសីហនុ បណ្ដាលឲ្យមនុស្ស០៣នាក់បានស្លាប់ ដោយសារជ្រាយដីរលំបាក់របងថ្មសង្កត់លើ
ខេត្តព្រះសីហនុ៖ស្ថិតក្នុងស្ថានភាពភ្លៀងនៅតែបន្តធ្លាក់យ៉ាងគំហុក ធ្វើឲ្យផ្ទះប្រជាពលរដ្ឋនៅតំបន់ទំនាប មានទឹកលិចចូលក្នុងផ្ទះ ព្រមទាំងផ្លូវនានាក្នុងក្រុងព្រះសីហនុ ជនលិចជាច្រើនកន្លែង ជាហេតុមិនអាចធ្វើចរាចរណ៍បានឡើយ។
នៅថ្ងៃទី៩ ខែសីហា ឆ្នាំ២០១៩នេះ ឯកឧត្តមគួច ចំរើន អភិបាល នៃគណៈអភិបាលខេត្តព្រះសីហនុ ជាប្រធានគណៈបញ្ជាការឯកភាពរដ្ឋបាលខេត្ត បានដឹកនាំកងកម្លាំងចម្រុះ ចុះត្រួតពិនិត្យជាក់ស្តែង នៅតាមតំបន់ដែលរងការលិចលង់ ព្រមទាំងណែនាំឲ្យអាជ្ញាធរតាមមូលដ្ឋាន និងសមត្ថកិច្ចពាក់ព័ន្ធបង្កើនការប្រុងប្រយ័ត្នតាមដានអំពីស្ថានភាពទឹកជំនន់។
ក្នុងនោះលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ព្រះសីហនុ បានណែនាំឲ្យកងកម្លាំងនគរបាលទាំងអស់ចេញអន្តរាគម បង្កើនការប្រុងប្រយ័ត្នល្បាតការពារថែរក្សាសន្តិសុខ បង្ការទប់ស្កាត់ ក្រែងមានហានិភ័យផ្សេងៗ កើតឡើងជាយថាហេតុ និងចាត់ឲ្យកម្លាំងនគរបាលចរាចរណ៍ ចេញសម្រួលការកកស្ទះចរាចរណ៍ ជូនប្រជាពលរដ្ឋទាំងកណ្តាលភ្លៀងផងដែរ។
លោកឧត្តមសេនីយ៍ស្នងការ ក៏បានណែនាំឲ្យកម្លាំងប្រចាំបញ្ជា ត្រូវបង្កើនការប្រុងប្រយ័ត្ន តាមដានស្ថានភាពជំនន់ទឹកភ្លៀងនៅតាមមូលដ្ឋានគ្រប់ទីកន្លែង។ហើយបញ្ជាឲ្យកងកម្លាំងអន្តរាគមន៍ពិសេស របស់ស្នងការដ្ឋាននគរបាលខេត្ត និងតាមក្រុងស្រុក ត្រូវប្រមូលផ្តុំកម្លាំង មធ្យោបាយ សម្ភារៈ ត្រៀមចេញធ្វើអន្តរាគមន៍ ជួយសង្គ្រោះប្រជាពលរដ្ឋ ពេលមានហេតុការណ៍កើតឡើង។
អង្គភាពអគ្គិសនីខេត្តព្រះសីហនុ ក៏បានប្រកាសផ្អាកការផ្គត់ផ្គង់ចរន្តអគ្គិសនី អស់រយៈពេលមួយព្រឹកផងដែរ ដោយបង្ការ មានហានិភ័យកើតឡើង ព្រមទាំងបង្គោលភ្លើងចំនួន០៦ដើម ត្រូវដួលរលំដោយសារព្យុះទឹកភ្លៀង។
ជំនន់ទឹកភ្លៀងនេះ បណ្ដាលឲ្យមនុស្ស០៣នាក់បានស្លាប់ ដោយសារជ្រាយដីរលំបាក់របងថ្មសង្កក់លើ ក្នុងពេលជនរងគ្រោះ កំពុងដេកលក់ នៅយប់ថ្ងៃទី៨ នៅសង្កាត់លេខ១ ក្រុងព្រះសីហនុ បណ្តាលឲ្យស្លាប់មនុស្សចំនួនពីរនាក់ប្តីប្រពន្ធ ឈ្មោះ ស៊ុន គឹមសាន ភេទប្រុស អាយុ៥៤ឆ្នាំ និងឈ្មោះ សេង ញ៉េន ភេទស្រី អាយុ៥៦ឆ្នាំ អ្នកទាំងពីរមានស្រុកកំណើតនៅស្រុកពញាក្រែក ខេត្តកំពង់ចាម មកធ្វើជាកម្មករសំណង់។
ករណីមួយទៀត នៅតំបន់សេដ្ឋកិច្ចពិសេស ឃុំបិតត្រាំងស្រុកព្រៃនប់ រលំរបងថ្ម សង្កត់លើជនជាតិចិនម្នាក់ បណ្តាលឲ្យស្លាប់ ឈ្មោះ ឆៃគ័រឈឹង ភេទប្រុស អាយុ៤៥ឆ្នាំ ជាមេការនៅក្នុងរោងចក្រ៕
