នាយឧត្តមសេនីយ៍ សៅ សុខា បញ្ជាឲ្យបិតចោលសិប្បកម្មកែច្នៃឈើខុសច្បាប់ និងដុតបំផ្លាញចោល រថយន្ដបាកុងចំនួន២០គ្រឿងទៀត នៅខេត្តមណ្ឌលគីរី
ខេត្តមណ្ឌលគិរី៖នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាឲ្យលុប និងបិទចោលសិប្បកម្មរោងកែច្នៃឈើខុសច្បាប់ នៅខេត្តមណ្ឌលគិរី។
ការដាក់បទបញ្ជារបស់នាយឧត្តមសេនីយ៍ សៅ សុខា ត្រូវបានធ្វើឡើងក្នុងកិច្ចប្រជុំត្រួតពិនិត្យការងារទប់ស្កាត់ និងបង្ក្រាបបទល្មើសធនធានធម្មជាតិ នៅសាលាខេត្តមណ្ឌលគិរី នាព្រឹកថ្ងៃអង្គារ ទី០៦ ខែសីហា ឆ្នាំ២០១៩ ដោយមានការចូលរួមពីមន្ត្រីអន្តរក្រសួង និងស្ថាប័នចំរុះ ដែលមានការពាក់ព័ន្ធ។
លោកឧត្តមសេនីយ៍ត្រី អេង ហ៊ី អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានថ្លែងប្រាប់អ្នកសារព័ត៌មានឲ្យដឹងដែរថា ក្រៅពីការបញ្ជាឲ្យបិទចោលនូវសិប្បកម្មទាំងអស់នោះ នាយឧត្តមសេនីយ៍ សៅ សុខា ក៏បានបញ្ជាឲ្យធ្វើការដុតបំផ្លាញចោលនូវមធ្យោបាយដឹកឈើ រថយន្ដបាកុងកែច្នៃ ដែលហួសសុពលភាពប្រើប្រាស់ចំនួន២០គ្រឿងទៀតផងដែរ ។
ដោយឡែក មធ្យោបាយដែលសមត្ថកិច្ចបង្ក្រាបនាពេលកន្លងមក ប៉ុន្ដែមិនមានឈើខុសច្បាប់នៅលើនោះ នាយឧត្តមសេនីយ៍ សៅ សុខា ក៏បានណែនាំឲ្យប្រគល់ជូនម្ចាស់ដើមវិញផងដែរ ព្រោះថា មធ្យោបាយទាំងអស់នេះមិនពាក់ព័ន្ធជាមួយបទល្មើសនោះឡើយ៕
