សាខាកាកបាទក្រហមកម្ពុជា ខេត្តកោះកុង ប្រគល់អំណោយមនុស្សធម៌ ដល់ប្រជាពលរដ្ឋរងគ្រោះ ដោយខ្យល់កន្ទ្រាក់សរុបចំនួន២៣គ្រួសារ
ខេត្តកោះកុង៖នាព្រឹកថ្ងៃច័ន្ទ ៥កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៥ ខែសីហា ឆ្នាំ២០១៩ សាខាកាកបាទក្រហមកម្ពុជា ខេត្តកោះកុង បានសហការអនុសាខាកក្រក ក្រុងខេមរភូមិន្ទ ដឹកនាំដោយ លោក ឈេង សុវណ្ណដា ប្រធានគណៈកម្មាធិការអនុសាខា សហការជាមួយអជ្ញាធរ មូលដ្ឋាន បាននាំយកអំណោយមនុស្សធម៌ ជូនដល់ប្រជាពលរដ្ឋរងគ្រោះដោយ ខ្យល់កន្ទ្រាក់កាលពីថ្ងៃទី៣និងទី៤ ខែសីហា ឆ្នាំ២០១៩ សរុបចំនួន២៣គ្រួសារ នៅសង្កាត់ស្មាច់មានជ័យ១៥គ្រួសារ សង្កាត់ដងទង់០៤គ្រួសារ និងសង្កាត់ស្ទឹងវែង០៤គ្រួសារ ក្រុងខេមរភូមិន្ទ ខេត្តកោះកុង ដែលរងខូចខាតហ្វីប្រូស៊ីម៉ង់ចំនួន៣១១សន្លឹក ស័ង្កសីចំនួន៧២សន្លឹក និងសម្ភារៈមួយចំនួនទៀត។
ក្នុងឱកាសនោះដែរ លោកនាយកសាខា បានពាំនាំនូវប្រសាសន៍ផ្តាំផ្ញើសួរសុខទុក្ខ និងសោកស្តាយពីសំណាក់លោកជំទាវប្រធានគណៈកម្មាធិការសាខា ពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាលសម្តេច តែងតែគិតគូរអំពីសុខទុក្ខរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ពណ៌សម្បុរ និន្នាការនយោបាយអ្វីឡើយ។
អំណោយដែលត្រូវចែកជូនក្នុងគ្រួសារនីមួយៗទទួលបាន៖អង្ករចំនួន២៥គីឡូក្រាម,មី១កេស,ត្រីខ១០កំប៉ុង,តង់១ និងអាវយឺត២ ព្រមទាំងថវិកាប្រគល់អោយលោកប្រធានគណៈកម្មាធិការអនុសាខាក្រុង តំណាងប្រជាពលរដ្ឋ ដើម្បីទិញជាហ្វីប្រូស៊ីម៉ង់ និងស័ង្កសី ឆ្លើយតប ទៅតាមទំហំ នៃការខូចខាតរបស់គ្រួសាររងគ្រោះនីមួយៗ។
ជាមួយគ្នានោះដែរលោក ឈេង សុវណ្ណដា ប្រធានគណៈកម្មាធិការអនុសាខាក្រុងខេមរភូមិន្ទ បានអំពាវនា វដល់បងប្អូនប្រជាពលរដ្ឋទាំងអស់ ពិសេសបងប្អូនប្រជានេសាទ ត្រូវមានការប្រុងប្រយ័ត្នខ្ពស់ ពីបាតុភូតខ្យល់កន្ត្រាក់ ផ្គរ រន្ទះ រលក សមុទ្រធំៗខ្ពស់ៗ៕
.jpg)
