ចាប់រថយន្តដឹកឈើ៣គ្រឿង ដុតកម្ទេចចោល នៅនឹងកន្លែង
ខេត្តស្ទឹងត្រែង៖កម្លាំងសមត្ថកិច្ចខេត្តស្ទឹងត្រែងបន្តដុតរថយន្តប៉ាកុងដឹកឈើចំនួន៣គ្រឿង នៅនឹងកន្លែងកាលពីថ្ងៃទី០៥ ខែសីហា ឆ្នាំ២០១៩ បន្ទាប់ពីអាជ្ញាធរស្រុកសៀមប៉ាង និងមន្ត្រីជំនាញពាក់ព័ន្ធ សហការជាមួយកម្លាំងសមត្ថកិច្ចថ្នាក់ខេត្ត រុករកឃើញ។
បើតាមសមត្ថកិច្ចបានឲ្យដឹងថា៖ការដុតរថយន្តប៉ាកុងដឹកឈើចំនួន៣គ្រឿងខាងលើនេះ បានរៀបចំឡើងដោយ មន្ត្រីឧទ្យានជាតិវីរជ័យ នៃមន្ទីរបរិស្ថានខេត្តស្ទឹងត្រែង និងមានការចូលរួមពីលោក ស៊ុយ អ៊ិនឡន អភិបាលរងស្រុកសៀមប៉ាង លោក ស៊ិន នូសិត្ស តំណាងស្នងការនគរបាលខេត្ត លោកជិម អ៊ិន តំណាងកងរាជអាវុធហត្ថខេត្ត និងលោក ហ៊ុយ សុគន្ធ នាយកឧទ្យានជាតិវីរជ័យ។
សូមបញ្ជាក់ដែរថា៖រថយន្តនេះជាមធ្យោបាយបម្រើឲ្យការដឹកជញ្ជូន បទល្មើសព្រៃឈើកន្លងមក ត្រូវបានឈ្មួញយកទៅលាក់ទុកនៅក្នុងព្រៃជ្រៅមួយកន្លែង ស្ថិតក្នុងភូមិចន្ទុ ឃុំសេកុង ស្រុកសៀមប៉ាង ខេត្តស្ទឹងត្រែង។
សមត្ថកិច្ចបញ្ជាក់ថា៖គិតចាប់តាំងពីថ្ងៃ៩ ខែកក្កដា ឆ្នាំ២០១៩ រហូតមកទល់ពេលនេះ សមត្ថកិច្ចបានរឹបអូស និងដុតមធ្យោបាយដឹកជញ្ជូនបទល្មើសព្រៃឈើសរុបចំនួនប្រមាណ២១គ្រឿងហើយ រាប់ទាំង៣គ្រឿងដែលដុតចោលខាងលើនេះ ក្នុងនោះ១៩គ្រឿងជារថយន្តប្រភេទប៉ាកុង និង២គ្រឿងជាត្រាក់ទ័រអូសឈើ៕