ជិះម៉ូតូកញ្ចាស់ឆក់ទូរស័ព្ទដៃ ត្រូវសមត្ថកិច្ចក្របួចបានទាំង២
រាជធានីភ្នំពេញ៖ជនសង្ស័យ២នាក់ ដែលធ្វើសកម្មភាពឆក់ទូរស័ព្ទដៃពីស្ត្រីម្នាក់ ដែលកំពុងសៀតនៅហោប៉ាវក្រោយ ត្រូវបានកម្លាំងនគរបាលខណ្ឌសែនសុខក្របួចចាប់បាន កាលពីវេលាម៉ោង២និង៣០នាទី ថ្ងៃទី៥ ខែសីហា ឆ្នំា២០១៩ នៅលើផ្លូវហាណូយ ស្ថិតភូមិត្រពាំងស្វាយ សង្កាត់គោកឃ្លាង ខណ្ឌសែនសុខ រាជធានីភ្នំពេញ ខណៈដែលព្យាមយាមជិះរត់គេច។
សមត្ថកិច្ចបានឲ្យដឹងថា៖ជនសង្ស័យទាំង២នាក់មានឈ្មោះ សីហា ភេទប្រុស អាយុ៣១ឆ្នាំ មុខរបរមិនពិតប្រាកដ ជាអ្នកបើកបរម៉ូតូស៊ូរ៉ុស ធ្វើសកម្មភាព និងឈ្មោះ ខុន ភឿន ភេទប្រុស អាយុ៣១ឆ្នាំ មុខរបរ មិនពិតប្រាកដ ជាអ្នកឆក់។អ្នកទាំង២នាក់មានទីលំនៅ ផ្លូវជាតិលេខ៥ ភូមិឃ្លាំងសាំង សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
ចំណែកជនរងគ្រោះឈ្មោះ សាក់ ចាន់ណា ភេទស្រី អាយុ២៦ឆ្នាំ មុខរបរនៅផ្ទះ ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។
សមត្ថកិច្ចបញ្ជាក់ថា៖មុនពេលកើតហេតុ ជនរងគ្រោះជិះម៉ូតូទៅរកទិញទឹកកក លុះទៅដល់ចំណុចកើតហេតុ ស្រាប់តែជនសង្ស័យ ជិះម៉ូតូមកដល់ឆក់យកទូរស័ព្ទ ម៉ាកOPPO ពីហោប៉ៅខោក្រោយ ហើយជិះរត់គេចខ្លួន ភ្លាមនោះជនរងគ្រោះស្រែកឆោឡោ ស្របពេលនោះកម្លាំងល្បាតរបស់ខណ្ឌសែនសុខ មកដល់ឃើញក៏ដេញតាមរហូតចូលដល់ទឹកដីសង្កាត់ទួលសង្កែ ទើបចាប់ខ្លួនបានតែម្តង។
នៅចំពោះមុខសមត្ថកិច្ចជនសង្ស័យឈ្មោះ ខុន ភឿន ជាអ្នកឆក់ផ្ទាល់បានសារភាពថា ក្រោយពីខ្លួនក្រឡេកឃើញជនរងគ្រោះសៀតទូរស័ព្ទនៅហោប៉ៅខោខាងក្រោយនឹកថាស៊ីផុយ ក៏ធ្វើសកម្មភាពឆក់ទូរស័ព្ទ តែមិននឹកស្មានថា កម្លាំងល្បាតរបស់ខណ្ឌសែនសុខ ដេញចាប់ខ្លួនបានបែបនោះទេ។
បច្ចុប្បន្នជនសង្ស័យរួមនិងវត្ថុតាង សមត្ថកិច្ចកំពុងកសាងសំណុំរឿង ដើម្បីចាត់ការតាមនិតិវិធី៕