ស្រវឹងដេកដួលតាមផ្លូវ បង្កការភ្ញាក់ផ្អើល សមត្ថកិច្ចត្រួតពិនិត្យឃើញធ្លាក់កាំភ្លើងខ្លីមួយដើម
រាជធានីភ្នំពេញ៖បុរសម្នាក់ដែលគេដឹងថា ជាហ៊ានផង និងជាអ្នករត់Pass App បានស្រវឹងដេកដួលតាមផ្លូវ បង្កការភ្ញាក់ផ្អើល ខណ:សមត្ថកិច្ចត្រួតពិនិត្យឃើញធ្លាក់កាំភ្លើងខ្លីមួយដើម។
ករណីនេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី២៨ ខែសីហា ឆ្នំា២០១៩ នៅតាមបណ្តោយផ្លូវ១០០៧ កែងនឹងផ្លូវ១៩៦៦ ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ព័ត៌មានពីកន្លែងកើតហេតុបានឲ្យដឹងថា នៅមុនកើតហេតុគេបានប្រទះឃើញម៉ូតូកង់បីឥណ្ឌាមួយគ្រឿងពណ៌ស ពាក់ផ្លាកលេខភ្នំពេញ 1HB-5147 ចតស្ងៀមនៅកណ្តាលផ្លូវ នៅចំណុចកើតហេតុក្នុងទិសដៅពីត្បូងទៅ ជើង ដោយមានការសង្ស័យបាននាំគ្នាដើរទៅមើល ស្រាប់តែម្ចាស់ម៉ូតូកង់បីដេកលក់បែកពពុះមាត់ សង្ស័យតែត្រូវថ្នាំគេ រួចក៏នាំគ្នារុញកង់បីមកអែបចិញ្ចើមផ្លូវហើយមានអ្នកខ្លះយកខ្ទឹមសមកជូនមាត់ និងយកទឹកក្រូចឆ្មារឲ្យផឹក ដើម្បីឲ្យស្វាងតែនៅតែមិនដឹងខ្លួនទៀត ទើបបាននាំគ្នារាយការណ៍ជូនសមត្ថកិច្ចមូលដ្ឋាន។
សមត្ថកិច្ចបានចុះមកដល់បាននាំគ្នា ដាស់ម្ចាស់ម៉ូតូកង់បីបន្តតែមិនងើបដដែលរួចបាន ឆែកឆេរនៅក្នុងកាបូបស្ពាយចំហៀងក៏ប្រទះឃើញកាំភ្លើងខ្លីមួយដើមម៉ាកឡុកទៀតផង។
ដោយសារដាស់មិនក្រោក សមត្ថកិច្ចបានឡើងបើកម៉ូតូកង់បីដឹកទាំងម្ចាស់យកទៅ អធិការដ្ឋាននគរបាលខណ្ឌសែនសុខភ្លាមៗ ស្រាប់តែមកដល់អធិការខណ្ឌមួយសន្ទុះ ទើបបុរសរូបនេះបានដឹងខ្លួន រួចបានប្រាប់សមត្ថកិច្ចថា ខ្លួនបានផឹកសុីជាមួយមិត្តភក្តិតិចតួច ស្រវឹងទើបបើកទៅមុខលែងរួចដេកលក់តែម្តង។
លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានឲ្យដឹងថា បុរសរូបនេះជាទាហាន មានលិខិតបញ្ជាក់ត្រឹមត្រូវ ហើយឆ្លៀតពេលរត់ Pass App បន្ថែមទៀត លោកជាអនុសេនីយ៍ឯក អន ពិសិដ្ឋ ធ្វើការនៅបញ្ជាការដ្ឋានវិស្វកម្ម៕
