អតីតឧកញ៉ា ហូរ ចំរើន ត្រូវបានតុលាការក្រុងភ្នំពេញ ប្រកាសផ្តន្ទាទោសដាក់ពន្ធនាគារ២ឆ្នាំ៦ខែ និងសងលុយទៅដើមបណ្តឹងជិត១០០លានដុល្លារ
រាជធានីភ្នំពេញ៖ឧកញ៉ា ហូរ ចំរើន ដែលធ្លាប់ត្រូវបានតុលាការប្រកាសផ្តន្ទាទោស ដាក់ពន្ធនាគាររឿងគំរាមបាញ់សម្លាប់ប្រពន្ធនោះ នៅពេលនេះក៏ត្រូវបានតុលាការ បានប្រកាសផ្តន្ទាទោសមួយ ករណីទៀត ពីបទឆបោក ដោយសម្រេចដាក់ពន្ធនាគារចំនួន២ឆ្នាំ ៦ខែ ហើយសម្រេចឲ្យសងលុយទៅដើមបណ្តឹង (ជនជាតិកូរ៉េ) ជាង៩៧លានដុល្លារ។
ការសម្រេចដាក់ទោសទណ្ឌដល់ឧកញ៉ារូបនេះ បានធ្វើឡើងដោយលោក ពេជ្រ វិជ្ជាធរ ចៅក្រមជំនុំជម្រះ និងលោក កុល បុន ព្រះរាជអាជ្ញារងអមសាលាដំបូងរាជធានីភ្នំពេញ។
ក្រៅពីការដាក់ទោសទណ្ឌនៅក្នុងពន្ធនាគារ និងតម្រូវឲ្យសងលុយទៅដើមបណ្តឹងវិញនោះ តុលាការក៏បានសម្រេចឲ្យជនជាប់ចោទធ្លាប់មានងារជា «ឧកញ៉ា» រូបនេះ សងជំងឺចិត្តជូនដើមបណ្តឹងចំនួន ២លានដុល្លារ និងពិន័យចូលរដ្ឋចំនួន៦លានរៀលផងដែរ។
សូមបញ្ជាក់ថា កាលពីព្រឹកថ្ងៃទី១៤ ខែកម្ភ: ឆ្នាំ២០១៩ សាលាឧទ្ធរណ៍បានបើកសវនាការ ប្រកាសសាលដីកាលើសំណុំរឿង អតីតឧកញ៉ា ហូរ ចំរើន ពាក់ព័ន្ធបទល្មើសចំនួន ២ករណី គឺករណីឆបោក និងចេញសែកស្អុយ ដោយសម្រេចមិនអនុញ្ញាតឱ្យអតីតឧកញ៉ារូបនេះ នៅក្រៅឃុំនោះទេ និងបន្តឃុំខ្លួនក្នុងពន្ធនាគារ តាមអំណាចសាលក្រមសាលាដំបូងរាជធានីភ្នំពេញដដែល។
ក្រោយការសម្រេច សាលាឧទ្ធរណ៍បានបង្វិលសំណុំរឿងជូនសាលាដំបូងរាជធានីភ្នំពេញ ដើម្បីបន្តនីតិវិធី រហូតមានការប្រកាសសាលាក្រមតែម្តង៕