សិក្ខាសាលាបណ្តុះបណ្តាលថ្នាក់តំបន់កំពត តាកែវ កោះកុង កែប ស្តីពីការគ្រប់គ្រងថែរក្សា និងព្យាបាលជំងឺគ្រុនឈាម
ខេត្តកំពត៖នៅព្រឹកថ្ងៃទី២៨ ខែសីហា ឆ្នាំ ២០១៩ នៅមន្ទីរសុខាភិបាលខេត្តកំពត មានបើកសិក្ខាស្តីពីការត្រួតពិនិត្យតាមដាននិងការ ការពារជំងឺគ្រុនឈាម ដោយសិក្ខាសាលានេះប្រព្រឹត្តទៅ ក្រោមអធិបតីយភាពលោកសាស្រ្តាចារ្យ យី ស៊ុនណារ៉ា ប្រធាននៃអនុគណៈកម្មការគ្លីនិកប្រយុទ្ធជំងឺគ្រុនឈាម និងជាអនុរដ្ឋលេខាធិការក្រសួងសុខាភិបាល និងមានការអញ្ជើញចូលរួមជាកិត្តិយសពីលោក វេជ្ជបណ្ឌិត ញា ប៊ុនថន ប្រធានមន្ទីរសុខាភិបាលខេត្តកំពត លោកសាស្ត្រា តឹក លីវណ្ណារ៉ា ប្រធានផ្នែកអាគារ"ឃ"នៃមន្ទីរពេទ្យគន្ធបុប្ផា (ភ្នំពេញ) លោកសាស្រ្តាចារ្យ អ៊ុង សុផល នាយករងមន្ទីរពេទ្យកុមារជាតិ លោកវេជ្ជបណ្ឌិត សុខា តំណាងកម្មវិធីជាតិគ្រុនឈាមលោកវេជ្ជបណ្ឌិត សុខ ស្រ៊ុន ប្រធាននាយកដ្ឋានមន្ទីរពេទ្យ។
តាមរបាយការណ៍របស់លោកវេជ្ជបណ្ឌិត ញា ប៊ុនថន ប្រធានមន្ទីរសុខាភិបាលខេត្តកំពត បានឲ្យដឹងថា ការបណ្តុះបណ្តាលវិជ្ជាជីវៈដល់ក្រុមគ្រូពេទ្យផ្នែកជំងឺគ្រុនឈាមកន្លងមកយើងឃើញថា លទ្ធផលដែលយើងទទួលបានប្រកបដោយប្រសិទ្ធភាព ទាំងសេវាឯកជន ទាំងសេវារដ្ឋ ដោយក្នុងនោះយើងបានទទួលផលវិជ្ជមានទាំងសងខាង ហើយការទទួលសេវានេះប្រកបដោយគុណភាព ដែលបានកាត់បន្ថយបាននូវអត្រាស្លាប់របស់កុមារ ក៏ដូចជាប្រជាពលរដ្ឋទាក់ទងនឹងជំងឺគ្រុនឈាម។
នេះជាផលប្រយោជន៍ដ៏ធំធេងសម្រាប់ផ្តល់ជូនសង្គមជាតិយើង គឺទទួលបានសេវាមួយប្រកបដោយការពេញចិត្ត ពេញថ្លើមដោយអាចទទួលយកបានទាំស្រុង។ផលមួយទៀត គឺបានមកលើមន្ត្រីសុខាភិបាលទាំងអស់ មិនរាប់ទាំងមន្ត្រីសេវារដ្ឋឬសេវាឯកជនទេ។ចំពោះផលដែលទទួលបានគឺជាស្នាដៃ ជាកិតិ្តយស ជាបច្ចេកទេស ជាបទពិសោធន៍ ជាប្រាក់រង្វាន់ ដែលស្របទៅតាមច្បាប់ ស្របទៅតាមនីតិវិធី ដែលរដ្ឋកំណត់ឲ្យ។
លោកប្រធានមន្ទីរសុខាភិបាល ក៏បានជំរុញដល់មន្ត្រីសុខាភិបាលទាំងអស់ សូមកុំយកតួនាទីរបស់ខ្លួនទៅអនុវត្តប្រាសចាកពីក្រមសីលធម៌ វិជ្ជាជីវៈ មិនមែនធ្វើជំនួញ ហើយការព្យាបាលត្រូវមានបទពិសោធន៍ប្រកបដោយវិជ្ជាជីវៈ ប្រកាន់ភ្ជាប់នូវក្រមសីកធម៌ឲ្យសក្តិសមជាគ្រូពេទ្យបម្រើវេសាជូនប្រជាពលរដ្ឋដោយភាពស្មោះត្រង់។
ក្នុងឱកាសបើកសិក្ខាសាលា លោកសាស្ត្រាចារ្យ យី ស៊ុនណារ៉ា អនុរដ្ឋលេខាធិការក្រសួងសុខាភិបាល បានបញ្ជាក់ថា ការបើកវគ្គបណ្តុះបណ្តាលថ្នាក់តំបន់នេះ គឺមានការចូលរួមពីក្រុមគ្រូពេទ្យផ្នែកជំងឺគ្រុនឈាមដែលមកពី កំពត តាកែវ កោះកុង និងកែប ដើម្បីស្វែងយល់កាន់តែច្បាស់នូវប្រភេទជំងឺគ្រុមឈាម ដែលជានិច្ចកាលជំងឺនេះបានរីករាលដាលមកលើកុមារនិងមនុស្សចាស់ ស្ទើទូទាំងប្រទេស។
លោកបានបន្ថែមទៀតថា បន្ទាប់ពីមានផ្ទុះករណីជំងឺគ្រុមឈាម ក្រសួងសុខាភិបាលបានយកចិត្តទុកដាក់ខ្លាំង ដោយក្រសួងបាននិងកំពុងជំរុញដល់មន្ទីរសុខាភិបាលទូទាំងប្រទេសឲ្យយកចិត្តទុកដាក់ខ្ពស់ដើម្បីរកវិធានការទប់ស្កាត់ បង្ការ និងព្យាបាលដោយគ្រូពេទ្យជំនាញជូនប្រជាពលរដ្ឋគ្រប់មជ្ឈដ្ឋាន។លើសពីនេះលោក យី ស៊ុនណារ៉ា ក៏បានជំរុញដល់មន្ត្រីបម្រើសេវាសុខាភិបាលទាំងសេវារដ្ឋ ទាំងសេវាឯកជន ត្រូវផ្តោតការយកចិត្តទុកដាក់ខ្ពស់ចំពោះការព្យាបាលជំងឺគ្រុនឈាមជូនប្រជាពលរដ្ឋ ហើយការផ្តល់សេវាក៏ត្រូវការចាំបាច់នូវជំនាញ វិជ្ជាជីវៈ ប្រកបដោយក្រមសីលធម៌ជាគ្រូពេទ្យ។
ក្រោយពីថ្លែងបើកសិក្ខាសាលារួចមក គណៈអធិបតីទាំងអស់ ក៏បានអញ្ជើញចុះទៅពិនិត្យមើលកុមារមានជំងឺគ្រុនឈាម ដែលកំពុងសំរាកព្យាបាលនៅអគារពេទ្យកុមារ នៃមន្ទីរពេទ្យបង្អែកខេត្តកំពត៕