រថយន្តស្ទូចដឹកម៉ាស៊ីនបុកគ្រឹះ បើកឡើងចំណោតរអិលថយក្រោយ បុកម៉ូតូ PCX បណ្តាលឲ្យកិនបុរសម្នាក់ស្លាប់យ៉ាងរន្ធត់
រាជធានីភ្នំពេញ៖រថយន្តស្ទូចម៉ាកហ៊ីយ៉ាន់ដាយដឹកម៉ាស៊ីនបុកគ្រឹះ បើកឡើងចំណោតមិនរួចរអិលថយក្រោយ បុកម៉ូតូ PCX កិនបុរសម្នាក់ស្លាប់យ៉ាងរន្ធត់។
ហេតុការណ៍នេះកើតឡើងកាលពីវេលាម៉ោង៨និង៣០នាទីព្រឹក ថ្ងៃទី២៧ ខែសីហា ឆ្នាំ២០១៩ នៅចំណុចផ្លូវបេតុងក្លោងទ្វារវត្តពោធិ៍ញាណ ស្ថិតនៅភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
សមត្ថកិច្ចបានឲ្យដឹងថា អ្នកបើកបររថយន្តមានឈ្មោះ ឆាយ វណ្ណៈ ភេទប្រុស អាយុ៤៥ឆ្នាំ មុខរបរបុកគ្រឹះ ស្នាក់នៅផ្ទះលេខ៣៥០ ផ្លូវ២៧ ភូមិត្នោតជ្រុំ សង្កាត់បឹងទំពុន២ ខណ្ឌមានជ័យ។ចំណែកជនរងគ្រោះដែលស្លាប់មានឈ្មោះ គ្រួច ភារម្យ ភេទប្រុស អាយុ២៧ឆ្នាំ មានស្រុកកំណើរនៅស្រុកព្រះស្តេច ខេត្តព្រៃវែង មុខរបររត់តុ ស្នាក់នៅបច្ចុប្បន្នផ្ទះជួល ភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
បើតាមប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3D-9823 បើកបរដោយបុរសម្នាក់ ក្នុងទិសដៅពីជើងទៅត្បូង លុះដល់ចំណុចកើតហេតុ រថយន្តបើកបានបើកឡើងចំណោតចេញពីផ្លូវបេតុង ដើម្បីឡើងលើផ្លូវ៣៧១ តែឡើងមិនរួចក៏រអិលថយក្រោយ កិនពីលើម៉ូតូPCX ពណ៌ស ពាក់ស្លាកលេខ ភ្នំពេញ 1FT-9631 និងកិនចំអ្នកបើកម៉ូតូជាប់ខាងក្រោមកង់រថយន្ត បណ្តាលឲ្យស្លាប់យ៉ាងរន្ធត់តែម្តង។
បន្ទាប់ពីកើតហេតុ សមត្ថកិច្ចនគរបាលមូលដ្ឋាន សហការជាមួយជំនាញចរាចរណ៍ក្រុង ចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាជាក្រោយ។ ដោយឡែកសពជនរងគ្រោះ សមត្ថកិច្ចប្រគលជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី៕
