យុទ្ធនាការរួមគ្នា ដើម្បីសុវត្ថិភាពចររាចរណ៍ផ្លូវគោក នៅកម្ពុជា
ខេត្តស្វាយរៀង៖សាខាកាកបាទក្រហមកម្ពុជាខេត្តស្វាយរៀង សហការជាមួយ គម្រោងយុវជនកាកបាទក្រហមកម្ពុជា និងសុវត្ថិភាពចរាចរណ៍ទីស្នាក់ការកណ្តាល មន្ទីរសាធារណៈការ និងដឹកជញ្ជូនខេត្ត និងនគរបាលចរាចរផ្លូវគោក នៅថ្ងៃអង្គារ ១២រោច ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៧ ខែសីហា ឆ្នាំ២០១៩នេះ បានធ្វើយុទ្ធនាការសុវត្ថិភាពចរាចរណ៍ផ្លូវគោកស្តីពីការពារជីវិត និងពិការបណ្តាលមកពីគ្រោះថ្នាក់ចរាចរណ៍។
ពិធីនេះមានគោលបំណងផ្សព្វផ្សាយដល់ប្រជាពលរដ្ឋ សិស្ស និស្សិត អាជីវករ និងសាធារណៈជន ឲ្យយល់ដឹងពីច្បាប់ចរាចរណ៍ផ្លូវគោក ត្រូវពាក់ មួកសុវត្ថិភាពឲ្យបានត្រឹមត្រូវរាល់ពេលធ្វើដំណើរ បើកបរចេះអធ្យាស្រ័យគ្នា មិនបើកបរក្រោមឥទ្ធិពលគ្រឿងស្រវឹង និងបើកបរលើសល្បឿនកំណត់ គោរពសិទ្ធិជនពិការ និងទុកសិទ្ធិអាទិភាពជូនជនពិការពេលប្រើប្រាស់ផ្លូវ ដើម្បីឈានទៅដល់ការកាត់បន្ថយអត្រាពិការ ស្លាប់ និងរបួសធ្ងន់ដោយសារគ្រោះថ្នាក់ចរាចរណ៍ ដែលជាកត្តាបង្ករឲ្យមានភាពក្រីក្រនៅកម្ពុជា។
ពិធីនេះបានការអញ្ជើញចូលរួមពី លោកជំទាវ សោម សេរីវឌ្ឍន៍ នាយិការរងនាយកដ្ឋានធនធានមនុស្ស កាកបាទក្រហមកម្ពុជា លោកជំទាវ ពៅ សុភាព ហេរញ្ញឹកគណៈកម្មាធិការសាខា តំណាងឯកឧត្តម ម៉ែន វិបុល ប្រធានគណៈកម្មាធិការសាខា លោក នូន លីហួន ប្រធានមន្ទីរសាធារណៈការ និងដឹកជញ្ជូនខេត្ត ដោយមានការចូលរួមផ្សព្វផ្សាយពីមន្ត្រីថ្នាក់កណ្តាល បុគ្គលិកសាខា យុវជនកាកបាទក្រហមកម្ពុជា មន្ត្រីមន្ទីរសាធារណៈការ និងដឹកជញ្ជូនខេត្ត ព្រមទាំងកម្លាំងនគរបាលចរាចរណ៍ផ្លូវគោក មន្ត្រីតាមមន្ទីរនានាជុំវិញខេត្ត សហភាពសហព័ន្ធយុវជនកម្ពុជា ក្រុមកាយរិទ្ធ និងប្រជាពលរដ្ឋសរុបចំនួន២៨០នាក់ ។
ក្នុងយុទ្ធនាការនេះមានការដង្ហែរក្បួនពីសាខា ទៅសាលាក្រុងស្វាយរៀង និងចែកជូននូវឯកសារពាក់ព័ន្ធ ខិតបណ្ណ័នានា នឹងច្បាប់ស្តីពីសុវត្ថិភាពចរាចរណ៍ផ្លូវគោក បិទចំណាំងផ្លាត និងមានការរៀបចំជាកម្មវិធីសំនួរ ចម្លើយស្តីពីចលនារបស់កាកបាទក្រហម ច្បាប់ និងសុវត្ថិភាពចរាចរណ៍ផ្លូវគោក អ្នកដែលឆ្លើយត្រូវទទួលបានមួកសុវត្ថិភាពពីក្រុមការងារថ្នាក់កណ្តាល និងសាខាផងដែរ៕