ឯកឧត្តម ទេសរដ្ឋមន្រ្តី គន់ គីម ស្នើឲ្យអាជ្ញាធរខេត្តកណ្តាល ធ្វើរបាយការណ៍ ឲ្យបានលំអិត ជាក់ស្តែង ពិសេសត្រូវត្រៀមផែនការណ៍សម្រាប់ គ្រប់គ្រងគ្រោះមហន្តរាយ
ខេត្តបណ្តាល៖ឯកឧត្តម នាយឧត្តមសេនីយ៍ គន់ គីម ទេសរដ្ឋមន្រី្ត ទទួលបន្ទុកបេសកកម្មពិសេស និងជាអនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានស្នើឲ្យអាជ្ញាធរខេត្ត ត្រូវធ្វើរបាយការណ៍ ឲ្យបានលំអិត ជាក់ស្តែង ពិសេសត្រូវត្រៀមផែនការណ៍សម្រាប់ គ្រប់គ្រងគ្រោះមហន្តរាយ ត្រូវត្រៀមទីទួលសុវត្ថិភាព មធ្យោបាយ សម្ភារៈ ការត្រៀមកម្លាំង សំរាប់ ជួយអន្តរាគមន៍ ដោយរៀបចំឲ្យមានការហ្វឹកហាត់ជាមុន និងត្រូវយកចិត្តទុកដាក់ បណ្តុះបណ្តាលធនធានមនុស្សផងដែរ។
ឯកឧត្តម ទេសរដ្ឋមន្រ្តី មានប្រសាសន៍បែបនេះក្នុងឱកាសដែលឯកឧត្តមដឹកនាំកិច្ចប្រជុំត្រួតពិនិត្យ ការងារត្រៀមបង្ការ និងសង្រ្គោះគ្រោះមហន្តរាយខេត្តកណ្ដាល នារសៀលថ្ងៃទី០២ ខែសីហា ឆ្នាំ២០១៩។ក្នុងកិច្ចប្រជុំនេះ ក៏បានការអញ្ជើញចូលរួមពីឯកឧត្តម នួន ផា ប្រធានក្រុមប្រឹក្សាខេត្តកណ្ដាល ឯកឧត្តមបណ្ឌិត ម៉ៅ ភិរុណ អភិបាល នៃគណៈអភិបាលខេត្តកណ្ដាល និងកងកំលាំងប្រដាប់អាវុធទាំងបី គណៈអភិបាលស្រុក-ក្រុង ទាំង១១ មន្ទីរពាក់ព័ន្ធ និងអាជ្ញាធរមូលដ្ឋានយ៉ាងច្រើនកុះករផងដែរ៕
