ចាប់ឃាត់ខ្លួន ជនសង្ស័យប្រុស ស្រីចំនួន៤នាក់ ពាក់ព័ន្ធករណីគ្រឿងញៀន
ខេត្តបន្ទាយមានជ័យ៖កម្លាំងសមត្ថកិច្ចក្រុងប៉ោយប៉ែត ដឹកនាំដោយលោកវរសេនីយ៍ឯក ធិន ស៊ិនដេត អធិការដ្ឋាននគរបាលក្រុងប៉ោយប៉ែត បានចុះប្រតិបត្តិការណ៍បង្ក្រាប និងចាប់ឃាត់ខ្លួនជនសង្ស័យបានចំនួន៤នាក់ ពាក់ព័ន្ធទៅនឹងករណីគ្រឿងញៀន។
ការចុះប្រតិបត្តិការណ៍នេះបានធ្វើឡើងកាលពីវេលាម៉ោង២២និង៣០នាទី ថ្ងៃព្រហស្បតិ៍ ៧រោច ខែស្រាពណ៍ ឆ្នាំកុរឯកស័ក ពុទ្ធសករាជ២៥៦៣ ត្រូវនឹងថ្ងៃទី២២ ខែសីហា ឆ្នាំ២០១៩ ចំនុចខាងកើតកាស៊ីណូឡាក់គី ភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
បើតាមលោកអធិការបានឲ្យដឹងថា ជនសង្ស័យទាំង៤នាក់រួមមាន:
ទី១-ឈ្មោះទូច ស្រីល័ក្ខ ភេទស្រី អាយុ៣៦ឆ្នាំស្នាក់នៅបណ្តោះអាសន្ន ភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ម្ចាស់ថ្នាំញៀន។
ទី២-ឈ្មោះពេជ្រ ស្រីមុំ ភេទស្រី អាយុ២៣ឆ្នាំ រស់នៅមណ្ឌល៩ ភូមិប្រជាធម្មកើត សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ មុរបរគ្មាន។
ទី៣-ឈ្មោះចក់ នា ហៅ ខ្លា ភេទប្រុស អាយុ៤២ឆ្នាំ ទីលំនៅមិនប្រាកដ មុខរបរគ្មាន។
ទី៤-ឈ្មោះផែន ម៉ៅ អាយុ៣២ឆ្នាំ ភេទប្រុស ជនជាតិខ្មែរ រស់នៅភូមិកាប់គោ សង្កាត់អូចារ ក្រុងបាត់ដំបង ខេត្តបាត់ដំបង មុខរបរគ្មាន។
លោកអធិការបន្តថា មុននឹងឈានដល់ការចាប់ខ្លួនជនសង្ស័យទាំង៤នាក់ខាងលើនេះ កម្លាំងសមត្ថកិច្ចប៉ុស្ដិ៍នគរបាលរដ្ឋបាលប៉ោយប៉ែត បានល្បាតនៅចំនុចខាងលើ បានជួបមុខសញ្ញាសង្ស័យ
មួយក្រុមកំពុងជួបជុំគ្នា ក៏បានធ្វើការត្រួតពិនិត្យឃើញមាន ដបកែច្នៃសំរាប់ជក់ថ្នាំញៀនចំនួន៤
,កែវចំនួន២,ដែកកេះចំនួន១២,សារធាតុញៀន គ្រាប់ពណ៍ផ្កាឈូក WY ចំនួន៣៣៦គ្រាប់,សារធាតុញៀនសថ្លាក្រាមចំនួន១១ថង់តូចកិប។
បច្ចុប្បន្នជនសង្ស័យទាំង៤នាក់ រួមនិងវត្ថុតាងសមត្ថកិច្ចកំពុងកសាងសុំណុំរឿង ដើម្បីចាត់ការតាមនិតិវិធី៕
