ប្រតិភូក្រសួងអប់រំ យុវជន និងកីឡា បើកកិច្ចប្រជុំស្តីពីការរៀបចំប្រារព្វពិធីទិវាអក្ខរកម្មជាតិ ០៨ កញ្ញា ២០១៩ ក្រោមប្រធានបទ អក្ខរកម្មផ្សារភ្ជាប់ នឹងជំនាញមុខរបរ
ខេត្តសៀមរាប៖នាព្រឹកថ្ងៃសុក្រ ០២ កើត ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០២ ខែសីហា ឆ្នាំ២០១៩ លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់របស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំជាមួយប្រតិភូក្រសួងអប់រំ យុវជន និងកីឡា ស្តីពីការរៀបចំប្រារព្វពិធីទិវាអក្ខរកម្មជាតិ ០៨ កញ្ញា ២០១៩ ក្រោមប្រធានបទ អក្ខរកម្មផ្សារភ្ជាប់ នឹងជំនាញមុខរបរ នៅបន្ទប់ប្រជុំសាលាខេត្តសៀមរាប ដែលដឹកនាំដោយ លោក គួច គូលំអរ ប្រធាននាយកដ្ឋានអប់រំក្រៅប្រព័ន្ធ នៃក្រសួងអប់រំ យុវជន និងកីឡា និងសមាជិកប្រតិភូ និងមានការអញ្ជើញចូលរួមពី លោក លោកស្រី ប្រធាន អនុប្រធាន មន្ទីរអង្គភាពជុំវិញខេត្ត កងកំលាំងប្រដាប់អាវុធ និងមន្ត្រីពាក់ព័ន្ធ។
ទិវាអក្ខរកម្មក្នុងឆ្នាំ ២០១៩នេះ គ្រោងរៀបចំនៅថ្ងៃទី ០៨ ខែ កញ្ញា ឆ្នាំ ២០១៩ នៅខេត្តសៀមរាប ក្រោមវត្តមានដ៏ខ្ពង់ខ្ពស់របស់ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា និងប្រតិភូក្រសួង និងមានការអញ្ជើញចូលរួមសរុបចំនូន១៦០០នាក់ ក្នុងនោះក្រសួង ស្ថាប័នចំនូន១៤ នាក់ មន្ទីរអប់រំ យុវជន និងកីឡា រាជធានីខេត្ត២៤អង្គការដៃគូនានាសរុបចំនួន៥៦០នាក់ និងខេត្តសៀមរាបសរុបចំនួនអ្នកចូលរូម មានចំនួន ១១០០នាក់ ក្នុងនោះរួមមាន ថ្នាក់ដឹកនាំខេត្ត មន្ទីរ-អង្គភាពពាក់ព័ន្ធ កងកំលាំងប្រដាប់អាវុធ គរុសិស្ស កាយរិទ្ធិ កាកបាទក្រហម សិស្សានុសិស្ស និងសិស្សអក្ខកម្ម៕
