សំណុំរឿងលោក ឡាយ វណ្ណៈ និងបក្ខពួក៣នាក់ ត្រូវបានតុលាការ ពន្យារពេលប្រកាសសាលក្រម
រាជធានីភ្នំពេញ៖សាលក្រមសំណុំរឿងលោក ឡាយ វណ្ណៈ អតីតអភិបាលខេត្តតាកែវ និងបក្ខពួក៣នាក់ ករណីសម្លាប់ស្រីកំណាន់ នាង ចេវ សុវឌ្ឍនា ត្រូវបានតុលាការពន្យារពេលទៅថ្ងៃក្រោយវិញ ដោយមិនកំណត់ពេលវេលាច្បាស់លាស់។
លោក ហម ម៉េងសែ អៈអាងថា ការសម្រេចពន្យាពេលប្រកាសសាលក្រមនេះ គឺដោយសារសំណុំរឿងមានភាពស្មុគស្មាញ ពាក់ព័ន្ធនឹងឯកសារ ដោយមុនសម្រេចត្រូវពិនិត្យអោយបានច្បាស់លាស់ ។
ក្រោយបានបញ្ចប់សវនាការកាលពីថ្ងៃទី២២ ខែកក្កដា កន្លងទៅ តុលាការបានកំណត់យក ទី២២ ខែសីហា ពោលគឺមានរយៈពេល១ខែ ដើម្បីប្រកាសសាលក្រម ប៉ុន្តែដល់ថ្ងៃកំណត់ តុលាការបានសម្រេចពន្យាពេលតទៅទៀត ។
ជនជាប់ចោទ ឡាយ វណ្ណៈ បដិសេធថាពុំបានសម្លាប់ស្រីកំណាន់នាង ចេវ សុវឌ្ឍនា ទេ ដោយសុំឱ្យតុលាការរកយុត្តិធម៌។ជាការកត់សម្គាល់ជនជាប់ចោទ ឡាយ វណ្ណៈ ហ៊ានស្បថចំពោះមុខក្រុមប្រឹក្សាជំនុំជម្រះថា”បើខ្ញុំបានសម្លាប់សង្សារមែនសូមឱ្យវត្ថុស័ក្តិសិទ្ធិបរាមុខខ្ញុំឲ្យខ្ញុំ និងប្រពន្ធកូនស្លាប់តៃហោង និងធ្លាក់នរក៩ជាន់អត់ចាប់ជាតិទៅចុះ”។
ប៉ុន្តែមន្ត្រីជំនាញ រកឃើញថា ជនរងគ្រោះបានស្លាប់ដោយសារអំពើឃាតកម្ម មុនឃាតកយកសពទៅព្យួរកជាប់បង្អួច។
គួរម្លឹកដែរថា៖ករណីឃាតកម្មនេះ ដំបូងឡើយត្រូវបានសមត្ថកិច្ចខេត្តតាកែវសន្និដ្ឋានថា ជារឿងអត្តឃាតព្រោះតែវិបត្តិស្នេហា ប៉ុន្ដែក្រោយពីបើកការស្រាវជ្រាវសមត្ថកិច្ចជំនាញរបស់នាយកដ្ឋានព្រហ្មទណ្ឌក្រសួងមហាផ្ទៃបានរកឃើញថាករណីនេះ មិនមែនជារឿងអត្តឃាតឡើយ ពោលគឺជារឿងឃាតកម្ម ដោយមានអ្នកបញ្ជានិងរៀបចំទុកសម្លាប់ជនរងគ្រោះ។
លោក ឡាយ វណ្ណៈ,លោក ឡាយ ណារិទ្ធ អតីតស្នងការរងនគរបាលខេត្តតាកែវ ត្រូវជាបងប្រុសបង្កើតលោក ឡាយ វណ្ណៈ ត្រូវបានតុលាការចោទប្រកាន់ពីបទឃាតកម្មប្រព្រឹត្តនៅចំណុចផ្ទះជួល ភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី២៦ ខែមករា ឆ្នាំ២០១៨ តាមមាត្រា១៩៩ នៃក្រមព្រហ្មទណ្ឌ។បទឃាតកម្មត្រូវផ្ដន្ទាទោសដាក់ពន្ធនាគារពី១០ឆ្នាំទៅ១៥ឆ្នាំ។
ដោយឡែកឈ្មោះ ម៉េន សាម៉ៃ អាយុ៣៦ឆ្នាំ និងឈ្មោះ ជឹម វុធ អាយុ៤១ឆ្នាំ ជាប់ចោទពីបទលាក់បំបាំងតម្រុយ តាមមាត្រា៥៣២ នៃក្រមព្រហ្មទណ្ឌ។បទល្មើសនេះ កំណត់ការផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ៕