ចាប់ឃាត់ខ្លួនជនសង្ស័យ២នាក់ ពាក់ពន្ឋ័ករណីគ្រឿងញៀន
ខេត្តកែប៖កម្លាំងការិយាល័យប្រឆាំងគ្រឿងញៀននគរបាលខេត្ត សហការជាមួយកម្លាំងអន្តរាគមន៍ពិសេស និងនគរបាលក្រុងកែប ដឹកនាំបញ្ជាពីលោកឧត្តមសេនីយ៍ត្រី បែន តារា ស្នងការនគរបាលខេត្តកែប ដោយមានការសម្របសម្រួលពីលោក ខា ដែនណា ព្រះរាជអាជ្ញារងអមសាលាដំបូង ខេត្តកំពត កាលពីថ្ងៃទី០១ ខែសីហា ឆ្នាំ២០១៩ បានស្ទាក់ចាប់ការចរាចរ ចែកចាយ និងប្រើប្រាស់គ្រឿងញៀន ដោយខុសច្បាប់ចំនួន២លើក នៅចំណុចខាងកើតរង្វង់មូលសេះស ក្នុងភូមិអូរក្រសារ សង្កាត់អូរក្រសារ ក្រុងកែប ដោយដកហូតជាក់ស្តែងបានថ្នាំញៀន១កញ្ចប់ធំ ទូរសព្ទ១គ្រឿង និងម៉ូតូ១គ្រឿង ដែលសាម៉ីជន ទទួលស្គាល់ថាជាម៉ាទឹកកក។
បន្តាប់មកសមត្ថកិច្ច បានបន្តនីតិវិធី ទៅចាប់មុខសញ្ញាម្នាក់ទៀត នៅចំណុចទល់មុខហាងខារ៉ាអូខេ (ដារីកា) ក្នុងភូមិកំពង់ត្រឡាច សង្កាត់ព្រៃធំ ក្រុងកែប ដោយដកហូតបានបន្ថែមថ្នាំញៀន១កញ្ចប់ធំ និងទូរស័ព្ទ ១គ្រឿងទៀត។
ជនសង្ស័យមានឈ្មោះដូចខាងក្រោម ៖
១- ឈ្មោះ អេង ភា ភេទប្រុស អាយុ៣០ឆ្នាំ មុខរបរជាងកាត់សក់ រស់នៅភូមិអូក្រសារ សង្កាត់អូរក្រសារ ក្រុងកែប។
២- ឈ្មោះ កែវ ប៊ន ភេទស្រី អាយុ១៩ឆ្នាំ រស់នៅភូមិដំណាក់ចង្អើរ សង្កាត់ព្រៃធំ ក្រុងកែប។
បច្ចុប្បន្នជនសង្ស័យ ត្រូវបាននាំមកកាន់ស្នងការដ្ឋាននគរបាលខេត្ត ដើម្បីបន្តនីតិវិធី និងរៀបចំសំណុំរឿង បញ្ជូនទៅសាលាដំបូងខេត្តកំពត ដើម្បីចាត់ការបន្តតាមនិតិវិធី៕