សាខាកាកបាទក្រហមកម្ពុជា ខេត្តកំពត នាំយកអំណោយមនុស្សធម៌ ផ្តល់ជូនស្រ្តីសម្រាលកូនភ្លោះ៣នាក់ នៅភូមិអូរក្រសារ
ខេត្តកំពត៖នាព្រឹកថ្ងៃពុធ ៦រោច ខែស្រាពណ៍ ឆ្នាំកុរ ឯកស័ក ព,ស ២៥៦៣ ត្រូវនឹងថ្ងៃទី២១ ខែសីហា ឆ្នាំ២០១៩ សាខាកាកបាទក្រហមកម្ពុជា ខេត្តកំពត ដឹកនាំដោយលោកជំទាវ លាង ហៃ ជាវ តាយ អនុប្រធានកិត្តិយសសាខាកាកបាទក្រហមកម្ពុជា ខេត្តកំពត និងសហការី បានចុះសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ផ្តល់ជូនស្រ្តីសម្រាលកូនភ្លោះ៣នាក់ ឈ្មោះទូច ធឿន អាយុ៣០ឆ្នាំ និងប្តីឈ្មោះ កឹម នាង អាយុ៣៥ឆ្នាំ រស់នៅភូមិអូរក្រសារ សង្កាត់អូរក្រសារ ក្រុងកែប ខេត្តកែប។
នាឱកាសនោះលោកជំទាវ បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក ទីទ័លក្រ មានជំងឺ ជនងាយរងគ្រោះ ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។
អំណោយផ្តល់ជូនរួមមាន៖អង្ករ២៥គីឡូក្រាម មី១កេស ស្ករស១គីឡូក្រាម ទឹកដោះគោឆៅ១ឡូ ឃីតទារក៣ឈុត និងថវិកា៤០០,០០០រៀល ។
ដោយឡែក លោកជំទាវ បានឧបត្ថម្ភថវិកាដល់អ្នកជំងឺចំនួន៦នាក់ ក្នុងម្នាក់៥០,០០០រៀលផងដែរ។
ក្នុងនោះលោកជំទាវ បានអំពាវនាវដល់បងប្អូនប្រជាពលរដ្ឋទាំងអស់ប្រកាន់យកនូវអនាម័យល្អ រស់នៅស្អាត ហូបស្អាត ផឹកស្អាត និងយកកូនទៅចាក់ថ្នាំបង្ការឲ្យបានគ្រប់ចំនួនដងតាមការណាត់របស់គ្រូពេទ្យ៕