ចាប់ឃាត់ខ្លួន អតីតមេដឹកនាំ គណបក្សសង្គ្រោះជាតិ ប្រចាំនៅស្រុកឈូកម្នាក់ តាមដីកាបង្គាប់របស់តុលាការ ពាក់ព័ន្ធការដឹកនាំ ប្រមូលផ្ដុំខុសច្បាប់
ខេត្តកំពត៖កាលពីថ្ងៃទី១៧ ខែឧសភា ឆ្នាំ២០១៩ កម្លាំងនគរបាលខេត្តកំពត បានចាប់ឃាត់ខ្លួនថ្នាក់ដឹកនាំជាន់ខ្ពស់អតីតគណបក្សសង្គ្រោះជាតិ ប្រចាំនៅស្រុកឈូក ខេត្តកំពតម្នាក់ តាមដីកាបង្គាប់របស់លោក អ៊ី ឃាង ចៅក្រមស៊ើបសួរសាលាដំបូងខេត្តកំពត ពាក់ព័ន្ធការដឹកនាំប្រមូលផ្ដុំខុសច្បាប់ នៅក្នុងមូលដ្ឋាន។
លោកឧត្តមសេនីយ៍ផ្កាយពីរ ម៉ៅ ច័ន្ទមធុរិទ្ធ ស្នងការដ្ឋាននគរបាលខេត្តកំពត បានប្រាប់អ្នកសារព័ត៌ឲ្យដឹងថា បុគ្គលរូបនេះមានឈ្មោះ នុត ពេជ អាយុ៦៣ឆ្នាំ អតីតសមាជិកក្រុមប្រឹក្សា ស្រុកឈូក និងជាអតីតអនុប្រធានប្រតិបតិ្ដស្រុកឈូក ខេត្តកំពត នៃអតីតគណបក្សសង្គ្រោះជាតិ ត្រូវបានកម្លាំងនគរបាលរបស់លោកចាប់ខ្លួន នៅវេលាម៉ោងជិត១១ព្រឹកពាក់ព័ន្ធការប្រមូលផ្ដុំខុសច្បាប់នៅតាមមូលដ្ឋាន។
យោងតាមដីកាបង្គាប់ឲ្យចាប់ខ្លួនរបស់តុលាការខេត្តកំពត ឈ្មោះ នុត ពេជ ត្រូវបានចោទប្រកាន់ពីបទ មិនអនុវត្តសេចក្ដីសម្រេចរបស់តុលាការ (ប្រឆាំងសាលដីការបស់តុលាការកំពូល) ប្រមូលផ្ដុំញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្ដនៅភូមិព្រៃសំណាងលើ ឃុំខ្ជាយខាងជើង ស្រុកដងទង់ ខេត្តកំពត កាលពីខែមេសា ខែឧសភា ឆ្នាំ២០១៩ បទល្មើសព្រហ្មទណ្ឌ ដែលមានចែងឱ្យផ្ដន្ទាទោសបញ្ញតិមាត្រា៥២៣,៤៩៤ និងមាត្រា៤៩៥ នៃក្រមព្រហ្មទណ្ឌ។
ពាក់ពន្ឋ័ករណីខាងលើនេះដែរ លោកឧត្តមសេនីយ៍ស្នងការបញ្ជាក់ថា ជនជាប់ចោទ ត្រូវបានសមត្ថកិច្ចបញ្ជូនទៅស្នងការដ្ឋាននគរបាលខេត្ត រួចបញ្ជូនបន្ដទៅកាន់តុលាការ ដើម្បីចាត់ការបន្ដតាមនិតិវិធី៕
