អភិបាលខេត្តសៀមរាប ដឹកនាំមន្ត្រីក្រោមឱវាត ចុះត្រួតពិនិត្យទីតាំងផ្ទុះហ្គាស នៅភូមិបន្ទាយចាស់
ខេត្តសៀមរាប៖បន្ទាប់ពីបើកការដ្ឋានជួសជុល ចាក់កៅស៊ូ កំណាត់ផ្លូវខ្នារចាស់មានប្រវែង៤៦០០ម និងបើកការដ្ឋានជួសជុល ចាក់កៅស៊ូ កំណាត់ផ្លូវ2SR3 (ផ្លូវក្រវ៉ាត់ក្រុង) មានប្រវែង២២៣០ម ក្រោមអធិបតីភាពឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនរួចកាលពីថ្ងៃទី១៥ ខែសីហា ឆ្នាំ២០១៩ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាបបានចុះត្រួតពិនិត្យទីតាំងដែលផ្ទុះហ្គាសកាលពីថ្ងៃទី១៤ ខែសីហា ឆ្នាំ២០១៩ នៅភូមិបន្ទាយចាស់ សង្កាត់ស្លក្រាម ក្រុងសៀមរាប។
ទន្ទឹមនឹងជួបហេតុការណ៍នេះ ឯកឧត្តម អភិបាលខេត្ត ក៏បានចាត់ឱ្យមន្ទីររ៉ែ និងថាមពល ធ្វើការចុះត្រួតពិនិត្យលក្ខណៈបច្ចេកទេសតាមបណ្ដាកន្លែងបញ្ចូលហ្គាសនានាក្នុងខេត្តទាំងអស់ ដើម្បីជៀសវាងកើតហេតុការណ៍កើតឡើងបន្តទៀត។
ជាមួយគ្នានេះ ឯកឧត្តម ទៀ សីហា អភិបាលខេត្ត បានសម្ដែងនូវការសោកស្ដាយចំពោះហេតុការណ៍ដែលមិននឹកស្មាននេះ ហើយក៏ចូលរួមសោកស្តាយចំពោះជនរងគ្រោះផងដែរ៕