រដ្ឋមន្ត្រីក្រសួងប្រៃសណីយ៍ និងទូរគមនាគមន៍ អញ្ជើញជាអធិបតី ក្នុងពិធីសម្ភោធបើកឱ្យប្រើប្រាស់ អង់តែនរបស់ក្រុមហ៊ុន មិត្តហ្វូន ស្មាត
ខេត្តកំពង់ឆ្នាំង៖នៅព្រឹកថ្ងៃពុធ ១៤កើត ខែ ស្រាពណ៌ ឆ្នាំកុរ ឯកស័ក ព.ស ២៥៦៣ ត្រូវនឹង ថ្ងៃទី១៤ ខែសីហា ឆ្នាំ២០១ ៩ ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍បានអញ្ជើញជាអធិបតីក្នុងពិធីសម្ភោធ បើកឱ្យប្រើប្រាស់អង់តែនរបស់ក្រុមហ៊ុន មិត្តហ្វូន ស្មាត និងប្រគល់ទទួលកុំព្យូទ័រ និងសម្ភារៈបច្ចេកទេសគាំទ្រ ការបង្រៀនបច្ចេកវិទ្យាគមនាគមន៍ និងព័ត៌មានសម្រាប់ការអប់រំតាមប្រព័ន្ធ (ឌីជីថល) នៅបរិវេណសាលាវិទ្យាល័យ ហ៊ុន សែន កំពង់លែង ខេត្តកំពង់ឆ្នាំង ។
វត្តមានដែលអញ្ជើញចូលរួមមាន ឯកឧត្តមរដ្ឋលេខាធិការ អនុរដ្ឋលេខាធិការ ឯកឧត្តមអភិបាលរងខេត្ត ឯកឧត្តម លោកជំទាវ គណៈប្រតិភូក្រុមការងារថ្នាក់ជាតិ ខេត្តចុះមូលដ្ឋានស្រុកកំពង់លែង គណៈអភិបាល កងកម្លាំង មន្ត្រីរាជការ ក្រុមប្រឹក្សាស្រុក ឃុំ ប្រជាពលរដ្ឋ លោកគ្រូ អ្នកគ្រូ សិស្សានុសិស្សចូលរួមសរុប៤៨៩នាក់។
ឯកឧត្តម អៀង វុធ អភិបាលរងខេត្តកំពង់ឆ្នាំងបានគូសបញ្ជាក់ថាៈជាកិត្តិយស ណាស់ថ្ងៃនេះដោយមានការផ្តួចផ្តើមរបស់ឯកឧត្តមប្រធានក្រុមការងារថ្នាក់ជាតិស្របតាមតម្រូវការរបស់បងប្អូនប្រជាពលរដ្ឋជាក់ស្តែងបច្ចុប្បន្នក្នុងគោលបំណង ដើម្បីចូលរួមអភិវឌ្បន៍មូលដ្ឋានតាមរយៈបណ្តុះបណ្តាល លើវិស័យបច្ចេកវិទ្យាគមនាគមន៍ និងព័ត៌មាន លើកកម្ពស់ប្រសិទ្ធភាពការងាររបស់មន្ត្រីមូលដ្ឋាន តាមរយះការប្រើប្រាស់បច្ចេកវិទ្យាគមនាគមន៍ និងព័ត៌មានផ្សព្វផ្សាយ ទាន់ពេលវេលា ។
ក្រោយពីលោកតំណាងឱ្យក្រុម ហ៊ុន មិតហ្វូន និងស្មាតបានរាយការណ៍ពីកិច្ចដំណើរការនៃការអាជីវកម្មរបស់ក្រុមហ៊ុនបានចូលរួមក្នុងការកសាងទូរគមនាគមន៍ ជាមួយរាជរដ្ឋាភិបាលកម្ពុជាក្នុងឆ្នាំ ២០១៨ មានចំនួន៩.០០០.០០០ដុល្លារ(ប្រាំបួនលានដុល្លារ )ផងដែរ។
ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសនីយ៍ និងទូរគមនាគមន៍បានមានមតិសំណេះសំណាល និងផ្តាំផ្ញើដល់អង្គពិធី ថ្ងៃនេះពីរចូលគ្នាគឺ សម្ពោធអង់ទែនរបស់ក្រុមហ៊ុន មិតហ្វូន ស្មាតហ្វូនផង និងពិធីប្រគល់ទទួលកុំព្យូទ័រ និងសម្ភារៈបច្ចេកទេសគាំទ្រ ការបង្រៀនបច្ចេកវិទ្យាគមនាគមន៍និងព័ត៌មាន សម្រាប់ការអប់រំតាមប្រព័ន្ធ ( ឌីជីថល )។
ឯកឧត្តម បានបន្ថែមទៀតថា៖ជាក់ស្តែង កុំព្យូទ័រ២៥គ្រឿង និងគ្រឿងបរិក្ខាជាច្រើនទៀតប្រគល់ជូនសាលាវិទ្យាល័យ ហ៊ុន សែន កំពង់លែង គ្រាន់ជាការបង្រៀនបច្ចេកវិទ្យាគមនាគមន៍ និងព័ត៌មាន សម្រាប់ការអប់រំតាមប្រព័ន្ធ(ឌីជីថល ) នៅកំរិតមធ្យមសិក្សាទុតិយភូមិ ក្រោមក្របខ័ណ្ឌមូលនិធិ នៃការកសាងសម្ថភាព ការស្រាវជ្រាវ និងការអភិវឌ្បន៍លើធនធានមនុស្សគ្រប់គ្នាផងដែរ៕
