ឯកឧត្តម ជាវ តាយ អភិបាលខេត្តកំពត អញ្ជើញជាអធិបតីក្នុងពិធី បើកការដ្ឋានសាងសង់ ផ្លូវបេតុងអាមេ ប្រវែង៦៦០ម៉ែត្រ ទទឹង ៦ម៉ែត្រ កំរ៉ាស់០,១៥ម៉ែត្រ ជើងទេ១,៥០ម៉ែត្រ ស្រុកទឹកឈូ
ខេត្តកំពត៖ ផ្លូវបេតុងអាមេប្រវែង៦៦០ម៉ែត្រ ទទឹង ៦ម៉ែត្រ កំរ៉ាស់០,១៥ម៉ែត្រ ជើងទេ១,៥០ម៉ែត្រ ស្ថិតនៅភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត ត្រូវបានបើកការដ្ឋានសាងសង់នាថ្ងៃពុធ ១៤កើត ខែស្រាពណ៌ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៤ ខែសីហា ឆ្នាំ២០១៩ ក្រោមអធិបតីភាពឯកឧត្តម ជាវ តាយ អភិបាល នៃគណៈអភិបាលខេត្តកំពត។
វត្តមានដែលបានអញ្ជើញចូលរួមក្នុងកម្មវិធីរួមមានៈឯកឧត្តម លោកជំទាវ ក្រុមប្រឹក្សាខេត្ត អភិបាលរងខេត្ត កងកំលាំងទាំងបីប្រភេទ លោក លោកស្រីប្រធានមន្ទីរ-អង្គភាពជុំវិញខេត្ត លោកអភិបាលស្រុកទឹកឈូ ក្រុមប្រឹក្សាឃុំម៉ាក់ប្រាង្គ មេភូមិ យុវជន សិស្សានុសិស្ស និងបងប្អូនប្រជាពលរដ្ឋសរុប៣៥០នាក់។
មានមតិសំណេះសំណាលក្នុងឱកាសនោះ ឯកឧត្ដម ជាវ តាយ បានមានប្រសាសន៍ថា ការបើកការដ្ឋានសាងសង់ផ្លូវមួយខ្សែរនេះគឺអនុវត្តន៍តាមផែនការអភិវឌ្ឍន៍ខេត្ត ដើម្បីរួមចំណែកសំរាល និងបំពេញតម្រូវការរបស់បងប្អូនប្រជាពលរដ្ឋក្នុងមូលដ្ឋាន ក៏ដូចជាអ្នកធ្វើដំណើរឆ្លងកាត់ ដែលកន្លងមកតែងជួបនូវការលំបាក ម្យ៉ាងទៀតក៏ជាការចូលរួមចំណែកកែលម្អសោភ័ណ្ឌភាពក្នុងស្រុកទឹកឈូរបស់យើងផងដែរ។
ទន្ទឹមនោះឯកឧត្ដម អភិបាលខេត្តបានក៏ផ្តាំផ្ញើដល់អាជ្ញាធរក្នុងមូលដ្ឋាន ក៏ដូចជាបងប្អូនប្រជាពលរដ្ឋ ត្រូវរួមសហការគ្នាថែរក្សា ការពារផ្លូវនេះដើម្បីប្រើប្រាស់ជាប្រយោជន៍សាធារណ:ឲ្យបានយូរអង្វែង៕
