ឪពុក ម្តាយ យំបោកខ្លួន ព្រោះកូនប្រុស ស្រីពីនាក់លង់ទឹកស្លាប់
ខេត្តបន្ទាយមានជ័យ៖គួរឲ្យសង្វែកខ្លាំងណាស់ក្មេងប្រុស ស្រី ចំនួន២នាក់បានលង់ទឹករណ្តៅម៉ៃខូក្រោយផ្ទះស្លាប់ ខណៈដែលឪពុក ម្តាយ កំពុងជាប់រវល់កម្មវិធីឡើងផ្ទះថ្មី។
ករណីដែលបង្កឲ្យមានការភ្ញាក់ផ្អើលនេះបានកើតឡើងកាលពីថ្ងៃទី១៣ ខែសីហា ឆ្នាំ២០១៩ នៅចំណុចក្រោយក្រុមហ៊ុនទឹកស្អាតប្រហែល៥០០ម៉ែត្រ ស្ថិតនៅភូមិគោដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
លោកទូច ដែលត្រូវជាបងម្តាយសពទាំងពីរនាក់បានប្រាប់អ្នកសារព័ត៍មានថា ក្រុមគ្រួសាររបស់ប្អូនគាត់បានធ្វើពិធីឡើងគេហដ្ឋានថ្មី ដោយអញ្ជើញភ្ញៀវញាតិមិត្តជិតខាង ពិសេសប្អូនបង្កើតនៅបាត់ដំបងឲ្យចូលរួមកម្មពិធីឡើងផ្ទះថ្មី។
លោកទូចបានបញ្ជាក់ថា នៅពេលពិធីឡើងគេហដ្ឋានថ្មីចប់ ដោយមិនចាប់អារម្មណ៍ពីកូនបាត់ពីថ្មើរណានោះឡើយ លុះពេលភ្ញៀវចេញទៅផ្ទះវិញអស់ ម្ចាស់ផ្ទះបានយកលុយមករាប់ស្រាប់តែពេលនោះបាត់កូនទាំង២នាក់មិនដឹងទៅណា ក៏ឆោឡោឡើងហើយដើររកពេលដើរទៅដល់ស្រះម៉ៃខូនៅក្រោយពីផ្ទះប្រហែល១០០ម៉ែត្រស្រាប់តែឃើញស្បែកជើងក្មេងទាំង២ ហើយក៏ចុះរាវរកក៏ប្រទះឃើញក្មេងទាំង២ ក៏បីយកមកផ្ទះហើយសភាពទន់នាំគ្នារលាក់ឲ្យចេញទឹក ទោះបីខិតខំរលាក់យ៉ាងណានៅមិនដឹងខ្លួន ព្រោះក្មេងទាំង២នាក់នេះបានដាច់ខ្យល់ស្លាប់បាត់ទៅហើយ។
ក្រោយពីកើតហេតុរួចមាននគរបាល និងកំលាំងអាវុធហត្ថជំនាញចុះមកដល់កន្លែងកើត ហេតុដើម្បីធ្វើការពិនិត្យសព។
សពក្មេងស្រីរងគ្រោះមានឈ្មោះ ជា ដាវរី អាយុ៥ឆ្នាំ ម្តាយឈ្មោះ ង៉ាន់ សុជាតិ ប្តីឈ្មោះដុក ធីតា រស់នៅភូមិគោដ្ឋាន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ ចំណែកសពក្មេងប្រុសមានឈ្មោះត្រាំ សាន់ ប្រុសអាយុ៦ឆ្នាំ ឪពុកឈ្មោះ ហេង ត្រា ម្តាយឈ្មោះង៉ាន់លី រស់នៅស្រុកឯកភ្នំ ខេត្តបាត់ដំបង។
លោក ស៊ី ឌីបាន បញ្ជាក់ឲ្យដឹងទៀតថា ក្រោយពីមន្ត្រីជំនាញរបស់លោកធ្វើការត្រួត ពិនិត្យរួចហើយបានធ្វើការសន្និដ្ឋានថា ក្មេងទាំង២នាក់ពិតជាស្លាប់ដោយ លង់ទឹកពិតប្រាកដមែន។ សពត្រូវបានក្រុមគ្រួសាររៀបចាត់តែងធ្វើបុណ្យតាមប្រពៃណី៕
