កិច្ចប្រជុំសាមញ្ញលើកទី២ អាណត្តិទី៣ របស់ក្រុមប្រឹក្សាស្រុកកំពង់លែង ខេត្តកំពង់ឆ្នាំង
ខេត្តកំពង់ឆ្នាំ៖នាព្រឹកថ្ងៃពុធ ១៥រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣១ ខែកក្កដា ឆ្នាំ ២០១៩ លោក ឡោ សាលីម ប្រធានក្រុមប្រឹក្សាស្រុក និងលោក ហ៊ូ ប៊ុនថន អភិបាលរងស្រុក បានបើកកិច្ចប្រជុំសាមញ្ញលើកទី២ អាណត្តិទី៣ នៅសាលាស្រុកកំពង់លែង ដោយមានការចូលរួមពីសមាជិក សមាជិកា លោក លោកស្រី មេឃុំទាំង៩ ប្រធានការិយាល័យ និងអង្គភាពជំនាញជុំវិញស្រុក កងកម្លាំងទាំង៣ និងអ្នកពាក់ព័ន្ធមួយចំនួនទៀតសរុប៥០រូប ស្រី១១រូប។
លោក ឡោ សាលីម ប្រធានក្រុមប្រឹក្សាស្រុកកំពង់លែង បានមានមតិស្វាគមន៍ និងបើកកិច្ចប្រជុំដោយលើកឡើងថាៈ កិច្ចប្រជុំនេះគឺយើងធ្វើឡើងឱ្យស្របទៅនិងការណែនាំរបស់ក្រសួងមហាផ្ទៃ ហើយការប្រជុំលើកទីមួយពុំមានសិទ្ធិក្នុងការអនុម័តទៅលើចំណុចណាមួយបានឡើយ គឺគ្រាន់តែប្រជុំទទួល ការផ្សព្វផ្សាយ និងពិភាក្សាគ្នាខ្លះៗ ទៅតាមរបៀបវារៈប៉ុណ្ណោះ។
លោក ឡោ សាលីម បានបន្តលើកឡើងថា ក្រុមប្រឹក្សាគឺជាតំណាងសាធារណៈ ជាអ្នកការពារ និងជាអ្នកបម្រើឱ្យផលប្រយោជន៍ប្រជាពលរដ្ឋទាំងអស់ដែលស្ថិតនៅក្នុងដែនសមត្ថកិច្ចរបស់ខ្លួនពិសេស សមាជិកក្រុមប្រឹក្សាត្រូវស្គាល់ពីតួនាទីភារកិច្ចរបស់ខ្លួន សិទ្ធិអំណាចរបស់ក្រុមប្រឹក្សា ដែលមានសិទ្ធិធ្វើសេចក្តីសម្រេចខាងបញ្ញាតិ្ត និងខាងប្រតិបត្តិប៉ុណ្ណោះ ខិតខំស្រាវជ្រាវរៀនសូត្រ និងយល់ដឹងពីតួនាទីភារកិច្ចរបស់ខ្លួន ឱ្យស្របតាមគោលការណ៍បែបបទ និងនីតិវិធីដែលបានកំណត់ក្នុងច្បាប់ផងដែរ។
របៀបវារៈនៃកិច្ចប្រជុំថ្ងៃនេះមាន៖
១. ពិនិត្យកូរ៉ុម និងរាយការណ៏ពី វត្តមាន អវត្តមាន ប្រធាន និងសមាជិកអង្គប្រជុំ។
២. ពិនិត្យ ពិភាក្សាបំពេញបន្ថែម និងអនុម័តលើសេចក្តីព្រាងរបៀបវារៈនៃកិច្ចប្រជុំសាមញ្ញលើកទី២ អាណត្តិទី៣។
៣. ពិនិត្យ ពិភាក្សាបំពេញបន្ថែម និងអនុម័តលើកំណត់ហេតុប្រជុំសាមញ្ញលើកទី១ របស់ក្រុមប្រឹក្សាស្រុក អាណត្តិទី៣ កាលពីថ្ងៃទី ២៦ ខែ មិថុនា ឆ្នាំ ២០១៩។
៤. ពិនិត្យ ពិភាក្សា បំពេញបន្ថែម និងអនុម័តលើសេចក្តីព្រាង ដីកា បទបញ្ជាផ្ទៃក្នុង របស់ក្រុមប្រឹក្សាស្រុក អាណត្តិទី៣។
៥. ពិនិត្យ ពិភាក្សា បំពេញបន្ថែម និងអនុម័តលើសេចក្តីព្រាងប្រតិទិនប្រជុំសាមញ្ញរបស់ក្រុមប្រឹក្សាស្រុក អាណត្តិទី៣ រយះពេល ១២ ខែចាប់ពីខែ កក្កដា ឆ្នាំ ២០១៩ ដល់ខែ មិថុនា ឆ្នាំ២០២០។
៦. បញ្ហាផ្សេងៗ សំណួរចម្លើយ និងបូកសរុបបិទកម្មវិធីប្រជុំ ៕