ក្មេងស្រីអាយុ១៤ឆ្នាំម្នាក់ ត្រូវជនមិនស្គាល់មុខ ចូលវាយដល់ក្នុងផ្ទះ បណ្ដាលឲ្យរងរបួសជាទម្ងន់ រហូតមកទល់ពេលនេះ មិនទាន់មានចំណាត់ការពីសមត្ថកិច្ចក្រុងប៉ោប៉ែតនៅឡើយ
ខេត្តបន្ទាយមានជ័យ៖ករណីក្មេងស្រីអាយុ១៤ឆ្នាំជាអនីតិជនម្នាក់ ត្រូវបានជនមិនស្គាល់មុខចូលវាយដល់ក្នុងផ្ទះទាំងយប់បណ្តាលឲ្យសន្លប់ រហូតមកដល់ពេលនេះ សមត្ថកិច្ចនគរបាលក្រុងប៉ោយប៉ែត មិនទាន់ចុះសាកសួរជនរងគ្រោះ និងធ្វើការស្រាវជ្រាវ ស៊ើបអង្កេត រកមុខជនដៃដល់នៅឡើងទេ បន្ទាប់ពីគ្រួសារជនរងគ្រោះដាក់ពាក្យបណ្ដឹងទៅប៉ុស្តិ៍នគរបាលដីថ្មី ក្រុងប៉ោយប៉ែតនោះ។
ករណីហិង្សានេះបានកើតឡើងកាលពីវេលាម៉ោង១០និង៣០នាទីយប់ ថ្ងៃទី១១ ខែសីហា ឆ្នាំ២០១៩ ចំណុចខាងកើត បេនឡានក្រុង ស្ថិតនៅភូមិប៉ាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
បើតាមក្មេងស្រីរងគ្រោះឈ្មោះ ហុង លីងអើ អាយុ១៤ឆ្នាំ ជួយលក់សំបុត្ររថយន្តឪពុក បានឲ្យដឹងថា មុនដំបូងប្អូនស្រីបានទាញទ្វាផ្ទះបិត រួចបិតភ្លើងគេងនៅលើគ្រែ ក្រោយមកមានជនមិនស្គាល់មុខបានដើរមកឈរលើក្បាលគ្រែរួចដាល់មួយដៃបណ្តាលឲ្យសន្លប់តែម្តង។
ប្អូនស្រីដែលធ្វើការជាមួយជនរងគ្រោះមានឈ្មោះ គៀន ស្រីម៉ៅ អាយុ២៧ឆ្នាំ បានឲ្យដឹងថា នៅមុនពេលកើតហេតុវេលាម៉ោងថ្ងៃខែខាងលើ បានឃើញប្អូនស្រីបិទទ្វារ បិទភ្លើងចូលសម្រាក លុះ១០នាទីក្រោយមកក៏ស្រាប់តែប្អូនស្រីស្រែកថាអូយ ក៏បាត់មាត់ឈឹង ដោយមានការខុសពីប្រក្រតីក៏ចេញបើកភ្លើងមើល ក៏ឃើញជនសង្ស័យមួយភ្លេតស្មានតែគ្នាឯងមកលើកអីវ៉ាន់ បន្តិចក្រោយមកបានដឹងថាចោរ ក៏ស្ទុះទៅយកកាំបិតនៅក្នុងបន្ទប់ ហើយស្រែកថាចោៗ ពេលនោះជនដៃដល់ក៏បានរត់ចូលក្នុងបេនឡានបាត់តែម្ដង។
យោងតាមសម្ដីឪពុកក្មេងស្រីរងគ្រោះឈ្មោះ កែវ ប៊ុនហុង អាយុ៤៥ឆ្នាំ មុខរបរអ្នកលក់សំបុត្ររថយន្តក្រុង រស់នៅភូមិ ឃុំខាងលើ បានបញ្ជាក់ថា មុនពេលកើតហេតុវេលាម៉ោង១០ លោកបានចេញទៅរង្វង់មូលក្រុងប៉ោយប៉ែត ហើយនៅពេលនោះកូនស្រីគេងចុចទូរស័ព្ទ ខណ:ងងុយគេងក៏ទាញទ្វារបិទទុកប្រលោះតូច លុះមកដល់វេលាកើតហេតុ ក៏ត្រូវជនដៃដល់លូនមកវាយដល់ក្នុងផ្ទះបណ្ដាលឲ្យសន្លប់។
លោកបន្តថា នៅកន្លែងកើតហេតុមានសាក្សីម្នាក់បានឃើញមុខមាត់ជនដៃដល់ តែមិនសូវច្បាស់ដោយកំណត់បានមុខសញ្ញាខ្លះៗអំពីសម្លៀកបំពាក់ និងរាងរៅអាយុប្រហែល២០ក្រាសទៅ៣០ស្តើង អំពីភិនភាគជនដៃដល់ ពាក់មួក ស្លៀកពាក់អាវសធំប្រភេទអ្នករើសអេតចាយ។
លោកបញ្ជាក់ថា លោកមិនបានចោទប្រកាន់ទៅលើអ្នកណាម្នាក់នោះទេ តែធម្មតាទេការរកស៊ីតែងតែមានការកាច់កុងគ្នា ពីព្រោះមុខរបរលក់សំបុត្រឡានដូចគ្នា ហើយបច្ចុប្បន្ននេះនៅជុំវិញផ្ទះរបស់លោកមិនត្រូវគ្នាឡើយ(មិននិយាយរកគ្នា) តែការមិនត្រូវគ្នានេះមិនមានការឈ្លោះប្រកែកឬវាយតប់ ជេរបញ្ចោរគ្នានោះទេ។
លោកបញ្ជាក់ទៀតថា ក្រោយពីកើតហេតុលោកបាននាំកូនស្រីទៅ មន្ទីរពេទ្យ បន្ទាប់មកលោកបានស្វែងរកជនសង្ស័យ រហូតចាប់បានម្នាក់ប្រគល់ឱ្យសមត្ថកិច្ចនគរបាលប៉ុស្តិ៍ដីថ្មី តែលោកមិនប្រាកដថាជាជនដៃដល់ឬក៏មិនមែននោះទេទុកឱ្យសមត្ថកិច្ចស្រាវជ្រាវបន្តក្រោយមកលោកក៏បានដាក់ពាក្យបណ្តឹងនៅប៉ុស្តិ៍នគរបាលដីថ្មី ក្រុងប៉ោយប៉ែតតែម្តង រហូតមកទល់ពេលនេះមិនទាន់មានពន្លឺ ចុះមកធ្វើការសាកសួរជនរងគ្រោះ និងធ្វើការស្រាវជ្រាវរកមុខឃាតករនៅឡើងទេ។
ជាមួយគ្នានេះដែរលោកបានសំណូមពរទៅដល់អាជ្ញាធរមានសមត្ថកិច្ច ពាក់ព័ន្ធទាំងអស់នៅក្រុងប៉ោយប៉ែត មេត្តាស្រាវជ្រាវ វែកមុខជនដៃដល់ ដើម្បីចាប់យកមកផ្តន្ទាទោសតាមច្បាប់ឲ្យខានតែបាន៕
