ឃាត់ខ្លួនគ្រូពេទ្យចាក់ថ្នាំ តាមភូមិគ្មានសញ្ញាបត្រម្នាក់ បន្ទាប់ពីបានធ្វើឲ្យស្ត្រីម្នាក់ ប្រកាច់ស្លាប់
ខេត្តឧត្តរមានជ័យ៖គ្រូពេទ្យចាក់ថ្នាំតាមភូមិគ្មានសញ្ញាបត្រម្នាក់ ត្រូវបានសមត្ថកិច្ចចាប់ឃាត់ខ្លួនកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី១១ ខែសីហា ឆ្នាំ២០១៩ ពាក់ពន្ឋ័ករណីឃាតកម្ម ដោយអចេតនា ដោយ(ព្យាបាលជំងឺ បណ្តាឲ្យស្លាប់ជនរងគ្រោះ)។
សូមជំរាបដែរថា ការចាប់ឃាត់ខ្លួនជនសង្ស័យ ដោយមានការសម្របសម្រួលនិតិវិធីពីលោក កូយ កាន់យ៉ា ព្រះរាជអាជ្ញាអមសាលាដំបូងខេត្តឧត្តរមានជ័យ។
ជនសង្ស័យមានឈ្មោះ ស្រឿង ប៊ុន រិទ្ធ អាយុ៦១ឆ្នាំ (ឃាត់ខ្លួន)។រីឯជនរងគ្រោះមានឈ្មោះ ឈូក ម៉ៅ ភេទស្រី អាយុ២៤ឆ្នាំ អ្នកទាំងពីររស់នៅភូមិជ្រឹងខាងលិច សង្កាត់កូនគ្រៀល ក្រុងសំរោង ខេត្តឧត្តរមានជយ័។
ពាក់ពន្ឋ័ករណីខាងលើនេះដែរបើតាមប្រភពព័ត៌មានបានឲ្យដឹងថា នៅវេលាម៉ោង១រសៀល ថ្ងៃទី១០ ខែសីហា ឆ្នាំ២០១៩ ឪពុកម្តាយជនរងគ្រោះបានហៅជនសង្ស័យ ដែលប្រកបរបរពេទ្យចាក់ថ្នាំ តាមភូមិឲ្យមកមើលជំងឺកូនរបស់ខ្លួន ដែលអ្នកភូមិច្រើនហៅថា ជំងឺទាស់សសៃ នៅពេលទៅដល់ជនសង្ស័យបាន ដាក់សេរ៉ូមឲ្យជនរងគ្រោះ លុះម៉ោងប្រហែល៤រសៀលក៏អស់សេរ៉ូម បន្ទាប់មកនៅម៉ោង៦ និង០០នាទីល្ងាចជនសង្ស័យបានឲ្យអ្នកជំងឺលេបថ្នាំចំនួន០៣ មុខផ្សេងគ្នា លុះមកដល់ម៉ោង៧ និង៤៥នាទី អ្នកជំងឺបានប្រកាច់ស្លាប់តែម្តង។
បន្ទាប់ពីទទួលពត៌មាននេះមន្ទីរសុខាភិបាល បានបញ្ជូនគ្រូពេទ្យ រួមសហការជាមួយប៉ុស្តិ៍នគរបាលរដ្ឋបាលកូនគ្រៀល ចុះដល់កន្លែងកើតហេតុ ធ្វើការពិនិត្យបច្ចេកទេសក្នុងការព្យាបាល រកឃើញថា ជនសង្ស័យប្រកបរបរដើរចាក់ថ្នាំ ក្នុងភូមិពុំមានសញ្ញាបត្របញ្ជាក់ថា មានវិជ្ជាជីវ:ជាពេទ្យនោះទេ និងពុំមានអាជ្ញាបណ្ណ័ពីក្រសួង ឬពីមន្ទីរសុខាភិបាលនោះដែរ។
បញ្ជាក់ អ្នកជំងឺស្លាប់ បណ្តាលមកពីការប្រើប្រាស់ថ្នាំ Glugose និង Vit amin Becom-plex ដែលមានសាធាតុB1លើសចំណុះ បណ្តាលឲ្យប្រតិកម្ម និងធ្វើឲ្យជាតិស្ករឡើងខ្លាំង។
បច្ចុប្បន្ន ជនសង្ស័យសមត្ថកិច្ចកំពុងធ្វើការសាកសួន និងរៀបចំកសាងសំណុំរឿងបញ្ជូនទៅតុលាការ ដើម្បីចាត់ការតាមនិតិវិធីផ្លូវ៕