ពិធីចែករង្វាន់សិស្សឆ្នើម នាដំណាច់ឆ្នាំសិក្សា២០១៨.២០១៩ នៃវិទ្យាល័យ ១០មករា១៩៧៩ ខេត្តសៀមរាប
ខេត្តសៀមរាប៖នាព្រឹកថ្ងៃព្រហស្បត្តិ៍ ១កើត ខែស្រាពណ៍ ឆ្នាំកុ ឯកស័ក ពុទ្ធសករាជ ២៥៦៣ត្រូវនឹងថ្ងៃទី០១ ខែសីហា ឆ្នាំ២០១៩នេះ ឯកឧត្តមឧកញ៉ាបណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប ឯកឧត្តម ទៀ សីហា អភិបាលនៃគណៈអភិបាលខេត្ត បានអញ្ជើញចូលរួមចែករង្វាន់ដល់សិស្សឆ្នើម នៃវិទ្យាល័យ១០មករា ១៩៧៩ ខេត្តសៀមរាបចំនួន២៦៤នាក់ទាំងពីរកម្រិតសិក្សា បានទទួលរង្វាន់លើកទឹកចិត្តប្រចាំឆ្នាំសិក្សា២០១៨.២០១៩ និងការចូលរួមពីសមាគមមាតាបិតា និង អាណាព្យាបាលសិស្ស គណៈកម្មការគ្រប់គ្រង សាលា លោកគ្រូ អ្នកគ្រូ ។
ក្នុងពិធីចែករង្វាន់សិស្ស នាដំណាច់ឆ្នាំសិក្សា២០១៨.២០១៩នោះ ឯកឧត្តម ទៀ សីហា ក៏បានធ្វើការបញ្ជាក់ និងផ្តាំផ្ញើ ដល់សិស្សានុសិស្សគ្រប់កម្រិតសិក្សាទាំងអស់ ឲ្យខិតខំយកចិត្តទុកដាក់ក្នុងការសិក្សា ដើមី្បឈានទៅការប្រឡងបញ្ចប់កម្រិត សិក្សារបស់ខ្លួន សំខាន់ចំពោះប្អូនៗ ក្មួយៗ ថ្នាក់ទី៩ ដែលត្រូវប្រឡងយកសញ្ញាបត្រមធ្យមសិក្សាបឋមភូមិ និងថ្នាក់ទី១២ ត្រូវប្រឡងសញ្ញាប័ត្រមធ្យមសិក្សាទុតិយភូមិឆ្នាំសិក្សា២០១៨.២០១៩ នៅពេលខាងមុខនេះ។
ឯកឧត្តមក៏បានបន្តទៀតថា ចំពោះប្អូនៗ ក្មួយៗ ដែលត្រូវប្រឡងសញ្ញាប័ត្រមធ្យមសិក្សាទុតិយភូមិឆ្នាំសិក្សា២០១៨.២០១៩ ត្រូវខិតខំសិក្សារៀនសូត្រ ដើមី្បប្រឡងឲ្យបានជាប់និទ្ទេស A ច្រើន នឹងទទួលបានរង្វាន់លើកទឹកចិត្តពីអាជ្ញាធរខេត្តសៀមរាប។
ក្នុងនោះឯកឧត្តមអភិបាលខេត្ត បានផ្តាំផ្ញើដល់មាតាបិតា អាណាព្យាបាលសិស្ស សូមចូលរួមជម្រុញ ដល់កូនៗរបស់ខ្លួន និង អប់រំណែនាំ ឲ្យខិតខំរៀនសូត្រ និងជៀសឲ្យឆ្ងាយពីគ្រឿងញៀន ពីព្រោះថា ប្អូនៗទាំងនេះហើយដែលជាធន ធានមនុស្សក្នុងកិច្ចអភិវឌ្ឍន៍ប្រទេសទៅអនាគត។
ឯកឧត្តមឧកញ៉ា បណ្ឌិត សៀង ណាំ អ្នកតំណាងរាស្ត្រមណ្ឌលសៀមរាប បានលើកផងដែរថា បច្ចុប្បន្ននេះ កម្ពុជាកំពុងស្ថិតក្រោមដំបូលនៃសន្តិភាព នឹង មានការអភិវឌ្ឍលើគ្រប់វិស័យ ដោយកត្តា នៃសន្តិភាពនេះ និងស្ថិតក្រោមការដឹកនាំដ៏ឈ្លាសវៃ សម្តេចតេជោ ហ៊ុន សែន ជានាយករដ្ឋមន្រ្តី។ម៉្យាងទៀត កម្ពុជាបានកំពុងមានការផ្លាស់ប្តូររវាងអតីតកាល មកកាន់បច្ចុប្បន្នកាល និង កំពុងមានចក្ខុវិស័យនៃការផ្លាស់ប្តូរបន្តទៀត ពីបច្ចប្បន្នសម្រាប់ទៅអនាគតផងដែរ ។
តាមរបាយការណ៍បញ្ជាក់របស់លោក គឹម ឡេង នាយកសាលា បានឲ្យដឹងថា សិស្សទាំងពីរកម្រិតដែលទទួលរង្វាន់លើកទឹកចិត្តនាឆ្នាំសិក្សា២០១៨. ២០១៩នេះ ចាប់លេខ១ លេខ២ និងលេខ៣ មានចំនួន២៦៤នាក់ ក្នុងចំណោមសិស្សសរុប៨៨ថ្នាក់ ។
សូមបញ្ជាក់ដែរថា ក្នុងពិធីនោះដែរឯកឧត្តមឧកញ៉ាបណ្ឌិត សៀង ណាំ និង ឯកឧត្តម ទៀ សីហា ក៏បានធ្វើការឧបត្ថម្ភដល់សិស្សដែលបានឆ្លើយត្រូវនឹងសំណួរដែលបានលើកឡើង ពីជីវប្រវត្តិ នៃព្រះរាជាណាចក្រកម្ពុជា ព្រមទាំងបានឧបត្ថម្ភដល់កម្មវិធី នូវទឹកប្រាក់ចំនួន១០លានរៀលដល់សាលាផងដែរ ៕