មន្ទីរអភិវឌ្ឍន៍ជនបទ ខេត្តមណ្ឌលគិរី បានរៀបចំកិច្ចប្រជុំស្ដីពី លទ្ធផលការងារអនុវត្តក្នុងឆមាសទី១ និងផែនការសកម្មភាពបន្ត លើវិស័យផ្គត់ផ្គង់ទឹកស្អាត និងអនាម័យជនបទ
ខេត្តមណ្ឌលគិរី៖នាព្រឹកថ្ងៃចន្ទ ៧កើត ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៨ ខែកក្កដា ឆ្នាំ២០១៩ លោក ឈឹម កាន អភិបាលរងខេត្តមណ្ឌលគិរី បានដឹកនាំកិច្ចប្រជុំស្ដីពី លទ្ធផលការងារអនុវត្តក្នុងឆមាសទី១ និងផែនការសកម្មភាពបន្ត លើវិស័យផ្គត់ផ្គង់ទឹកស្អាត និងអនាម័យជនបទខេត្ត ព្រមទាំងលោក លោកស្រី ប្រធាន អនុប្រធានមន្ទីរ អង្គភាពពាក់ព័ន្ធនានា អភិបាលក្រុង/ស្រុកទាំង៥ មេឃុំ/ចៅសង្កាត់ និងអង្គការដៃគូរអភិវឌ្ឍន៍នាន ដែលប្រព្រឹត្តទៅនៅសាលប្រជុំ មន្ទីរអភិវឌ្ឍន៍ជនបទខេត្តមណ្ឌលគិរី។
លោក ឈឹម កាន អភិបាលរងខេត្ត បានមានប្រសាសន៍ ណែនាំដល់ក្រុមការងារបច្ចេកទេសផ្គត់ផ្គង់វិស័យទឹកស្អាត និងអនាម័យជនបទខេត្ត ត្រូវបន្តយកចិត្តទុកដាក់បំពេញភារកិច្ចរបស់ខ្លួន ធ្វើឱ្យសម្រេចបានតាមការស្នើសុំរបស់បងប្អូនប្រជាពលរដ្ឋ ដែលពួកគាត់កំពុងជួបប្រទះបញ្ហាខ្វះទឹកស្អាត និងអនាម័យ។
ទន្ទឹមនឹងនោះ ក្រុមការងារបច្ចេកទេស ក៏ត្រូវអនុវត្តការងារនេះបន្ថែមទៀត ឱ្យមានប្រសិទ្ធភាព និងមានការទទួលខុសត្រូវ ក្រោយពីបង្កើត និងកែសម្រួលសមាសភាពនេះរួច ដើម្បីធ្វើឱ្យខេត្តមណ្ឌលគិរី ទទួលបានវិស័យផ្គត់ផ្គង់ទឹកស្អាត និងអនាម័យជនបទ ឱ្យមានកម្រិតខ្ពស់ ទៅតាមផែនការដែលបានគ្រោងទុក នៅឆ្នាំ២០២៣ ដល់ឆ្នាំ២០២៥ របស់រាជរដ្ឋាភិបាល ដែលបានដាក់ចេញ។
សូមបញ្ជាក់ដែរថា៖តាមរបាយការណ៍របស់ប្រធានមន្ទីរអភិវឌ្ឍន៍ជនបទខេត្ត លោក យន់ សារ៉ោម បានឱ្យដឹងថា បច្ចុប្បន្នខេត្តមណ្ឌលគិរី មានស្ថានភាពផ្គត់ផ្គង់ទឹកស្អាត និងអនាម័យជនបទ ក្នុងនោះក្រុងសែនមនោរម្យ មានស្ថានីយ៍ផលិតទឹកស្អាត១កន្លែង ផ្គត់ផ្គង់បាន៦៦២គ្រួសារ ក្នុងចំណោម៣.១៨៩គ្រួសារ មានបណ្តាញទឹកឯកជន២កន្លែង នៅស្រុកកែវសីមា និងស្រុកកោះញែក ផ្គត់ផ្គង់១៦៣៧គ្រួសារ និងបណ្តាញទឹកស្អាត១កន្លែង កំពុងសាងសង់នៅស្រុកពេជ្រាដា ក្រៅពីនោះ មានអណ្តូងស្នប់ និងអណ្តូងចម្រុះចំនួន១៩៦១អណ្តូង សរុបទាំងអស់ស្មើនឹង១៥.០២៤គ្រួសារ ស្មើនឹង៧៥,៩% ផ្នែកអនាម័យក្នុងខេត្ត មានបង្គន់អនាម័យសរុប៧.៤៥២បង្គន់ ស្មើនឹង៦៤,៩%៕
ទទឹមនោះដែរលោកអភិបាលរងខេត្ត បានស្នើដល់ មន្ទីរអភិវឌ្ឍន៍ជនបទខេត្ត អង្គការដៃគូរអភិវឌ្ឍន៍ជាតិ អន្តរជាតិ បន្តជួយឧបត្ថម្ភ គាំទ្រ ឱ្យបានកាន់តែច្រើនសម្រាប់ការងារអភិវឌ្ឍន៍ លើវិស័យផ្គត់ផ្គង់ទឹកស្អាត និងអនាម័យជនបទ នៅក្នុងខេត្ត និងត្រូវបន្ត ពង្រឹងការលើកកម្ពស់ ការផ្គត់ផ្គង់វិស័យទឹកស្អាត និងអនាម័យជនបទ ឱ្យសម្រេចបាន១០០% នៅឆ្នាំ២០២៥៕