រថយន្ត០៤គ្រឿង បុកបន្តគ្នា នៅស្រុកព្រៃនប់ សំណាងល្អមិនមានអ្នករងរបួស
ខេត្តព្រះសីហនុ៖ករណីគ្រោះថ្នាក់ចរាចរណ៍ដ៏រន្ធត់នៅតាមផ្លូវជាតិលេខ៤ ចន្លោះគីឡូម៉ែត្រលេខ ១៨៨-១៨៩ ស្ថិតនៅភូមិទួលទទឹង១ ឃុំទួលទទឹង ស្រុកព្រៃនប់ ខេត្តព្រះសីហនុកាលពីវេលាម៉ោង១៦ និង២០នាទីល្ងាចថ្ងៃទី០៨ ខែកក្កដា ឆ្នាំ២០១៩ ដោយរថយន្ត ចំនួន០៤គ្រឿងបានបុកបន្គគ្នា សំណាងល្អមិនបណ្ដាលឲ្យមានអ្នកគ្រោះថ្នាក់ គ្រាន់តែខូចខាតរថយន្តយ៉ាងដំណំ។
បើតាមមន្ត្រីនគរបាល បានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាងរថយន្ត ០៤គ្រឿង បុកតគ្នា ដែលមានទិសដៅភ្នំពេញឆ្ពោះទៅខេត្តព្រះសីហនុ។លោកបន្តថា រថយន្តទាំងបួនគ្រឿងដែលបង្កការគ្រោះថ្នាក់ចរាចរណ៍នេះរួមមាន៖
ទី១.រថយន្តម៉ាក NISAN ពណ៌ស ពាក់ផ្លាកលេខព្រះសីហនុ 3A-9993 (រថយន្តទី១) បើកបរដោយឈ្មោះ ម៉ៃ តុលា ភេទប្រុស អាយុ៣៤ឆ្នាំ មុខរបរបើកបររថយន្ត មានទីលំនៅភូមិព្រេច ឃុំរកាក្រៅ ក្រុងដូនកែវ ខេត្តតាកែវ។
ទី២.រថយន្តម៉ាក LEXUS RX300 ពណ៌ស ពាក់ផ្លាកលេខកណ្តាល 2C-8939 (រថយន្តទី២) បើកបរដោយឈ្មោះ ចែម បញ្ញា ភេទប្រុស អាយុ២៧ឆ្នាំ មុខរបររត់តាក់ស៉ី មានទីលំនៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល។
ទី៣.រថយន្តម៉ាក TOYOTA -PRUIS ពណ៍ផ្សែងបារី ពាក់ផ្លាកលេខភ្នំពេញ 2AW-8296 (រថយន្តទី៣) បើកបរដោយឈ្មោះ ឈន រតនា ភេទប្រុស អាយុ ៤១ឆ្នាំ មានទីលំនៅសង្កាត់មានជ័យ ខ័ណមានជ័យ រាជធានីភ្នំពេញ។
និងទី៤.រថយន្តម៉ាក FUSO ពណ៌ស ពាក់ផ្លាកលេខភ្នំពេញ 3A-0225 ( អ្នកបើកបរមិនទាន់ស្គាល់អត្តសញ្ញាណ)។
បច្ចុប្បន្ន វត្ថុតាងរថយន្តទាំង០៤គ្រឿង បានយករក្សាទុកជាបណ្តោះអាសន្ននៅប៉ុស្តិ៍នគរបាលរដ្ឋបាលឃុំទួលទទឹង។ដោយឡែកអ្នកបើករថយន្ត FUSO បានរត់គេចខ្លួនបាត់ក្រោយពេលកើតហេតុ៕
