បុរសជាកម្មករសំណង់ម្នាក់ បានស្លាប់បាត់បង់ជីវិតនៅនឹងកន្លែង ដោយសាររំលំជណ្តើរស្លាកហេហោ របស់ក្រុមហ៊ុន ភែ រើមែកស៍ នៅបរិវេណកាស៊ីណូផ្កាយ៥
ខេត្តបន្ទាយមានជ័យ៖ដោយមានការធ្វេសប្រហេសរបស់បុគ្គលិកក្រុមហ៊ុន «ភែ រើមែកស៍»PARAMAX ដែលដាក់ជណ្ដើរដែកមិនមានការប្រុងប្រយត្ន័ ខណៈដែលមេឃកំពុងភ្លៀង និងលាយខ្យល់កន្ត្រាក់ខ្លាំងផងនោះ ជាហេតុធ្វើអោយធ្លាក់ជណ្ដើរមកចំក្បាលជនរងគ្រោះ ដែលកំពុងជិះម៉ូតូនៅតាមផ្លូវ បណ្តាលឲ្យស្លាប់ភ្លាមៗនៅនឹងកន្លែងកើតហេតុ។
ហេតុការដែលដ៏រន្ធត់នេះបានកើតឡើងនៅវេលាម៉ោង១២ និង២០នាទីថ្ងៃត្រង់ ថ្ងៃសុក្រ ៤កើត ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៥ ខែកក្កដា ឆ្នាំ២០១៩ នៅចំណុចបរិវេណកាស៊ីណូ ផ្កាយ៥ ស្ថិតក្នុងភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ។
ជនរងគ្រោះដែលស្លាប់បាត់បង់ជីវិតមានឈ្មោះ សាយ សុភី ភេទប្រុស អាយុ៣២ ឆ្នាំ មុខរបរជាកម្មករសំណង់ ដែលមានប្រពន្ធឈ្មោះ យៀត សុភណ្ឌ័ អាយុ២៧ ឆ្នាំ មានកូនចំនួន២នាក់ ប្រុស០១នាក់ និងស្រី០១នាក់ សព្វថ្ងៃរស់នៅភូមិប្រជាធម្មខាងលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
បើតាមប្រភពព័ត៌មានឲ្យដឹងថា៖មុនពេលកើតហេតុបានគេឃើញជនរងគ្រោះ បើកម៉ូតូក្នុងទិសដៅពីជើងទៅត្បូង ស្របពេលមេឃកំពុងភ្លៀងធ្លាក់លាយលំទៅដោយខ្យល់កន្ត្រាក់ផងនោះ ស្រាប់តែជណ្ដើរដែករបស់ក្រុមហ៊ុន«ភែ រើមែកស៍»PARAMAX បានធ្លាក់មកចំលើជនរងគ្រោះ បណ្ដាលឲ្យស្លាប់នៅនិងកន្លែងកើតហេតុភ្លាមៗមួយរំពេច។
ជំវិញករណីដែលបង្កឲ្យមានគ្រោះថ្នាក់រហូតបាត់បង់អាយុជីវិតមនុស្សបែបនេះ ត្រូវបានមហាជនលើកឡើងថា នេះជាការ ធ្វេសប្រហេសរបស់ក្រុមហ៊ុន«ភែ រើមែកស៍»PARAMAX ដែលដាក់ជណ្ដើរខ្វះការការប្រុងប្រយត្ន័។
បច្ចុប្បន្នសពជនរងគ្រោះ ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕
