រដ្ឋបាលខេត្តរតនគិរី ប្រារព្វពិធីប្រកាសផ្ទេរភារកិច្ច និងតែងតាំងមុខតំណែងអភិបាលរងស្រុកបរកែវ
ខេត្តរតនគិរី៖នាព្រឹកថ្ងៃទី០៤ ខែកក្កដា ឆ្នាំ២០១៩ ឯកឧត្តម លន់ សុភាព អភិបាលខេត្តស្តីទី បានអញ្ជើញជាអធិបតីក្នុងពិធីប្រកាសផ្ទេរភារកិច្ច និងតែងតាំងមុខតំណែងអភិបាលរង នៃគណៈអភិបាលស្រុកបរកែវ ដោយលោក មាស សារ៉េត អភិបាលរងស្រុកបរកែវ ត្រូវបានផ្ទេរភារកិច្ចបំពេញការងារនៅសាលាខេត្តរតនគិរី និងត្រូវបានតែងតាំងលោក អ៊ូ ដារ៉ារិទ្ធិ ពីនាយករដ្ឋបាល មកជាអភិបាលរងស្រុកបំពេញក្នុងជួរគណៈអភិបាលស្រុក។
មានប្រសាសន៍សំណេះសំណាលថ្លែងក្នុងឱកាសនេះ ឯកឧត្តមអភិបាលខេត្តស្តីទី បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់អាជ្ញាធរស្រុកបរកែវ រក្សាបាននូវសន្តិសុខ សណ្តាប់ធ្នាប់សាធារណៈល្អប្រសើរ ជំរុញកំណើនសេដ្ឋកិច្ច ជីវភាពរស់នៅរបស់ប្រជាពលរដ្ឋ។
ទន្ទឹមគ្នានេះឯកឧត្តមបានណែនាំឱ្យអភិបាលរងស្រុក ដែលត្រូវបានតែងតាំងថ្មី ត្រូវបំពេញតួនាទីភារកិច្ចស្របតាមបទដ្ឋានច្បាប់ មានគណនេយ្យភាពជាមួយគណៈអភិបាល។
ព្រមជាមួយគ្នានេះ អាជ្ញាធរស្រុកត្រូវសហការសាមគ្គីភាព ឯកភាពផ្ទៃក្នុង ពង្រឹងរបៀបរបបការបំពេញការងារបន្ថែមទៀត លើកកម្ពស់ប្រសិទ្ធភាពការងារ គោរពតួនាទី ភារកិច្ច តាមថ្នាក់ដឹកនាំប្រគល់ជូន ត្រូវមានក្រមសីលធម៌ វិជ្ជាជីវៈក្នុងនាមជាមន្ត្រី ពង្រឹងការផ្តល់សេវាប្រកបដោយគណនេយ្យភាព តម្លាភាព ប្រកាន់នូវអភិក្រមទាំងប្រាំ ជំរុញពលរដ្ឋចូលអនុវត្តគោលនយោបាយរបស់រដ្ឋាភិបាល គោលនយោបាយភូមិ ឃុំ មានសុវត្ថិភាព ពង្រឹងវិធានការរដ្ឋបាល វិធានការច្បាប់នានា ពង្រឹងលើកកម្ពស់បន្ថែមទៀតនូវសន្តិសុខ សណ្តាប់ធ្នាប់សាធារណៈក្នុងមូលដ្ឋាន សំដៅអភិវឌ្ឍន៍មូលដ្ឋា ឆ្លើយតបបាននឹងតម្រូវការរបស់ប្រជាពលរដ្ឋ។បន្ថែមពីលើនេះ ឯកឧត្តមបានជំរុញឱ្យអាជ្ញាធរពាក់ព័ន្ធទាំងអស់ត្រូវអនុវត្តវិធានការចំពោះមុខគឺការចលនាទប់ស្កាត់ការឆ្លងនៃជំងឺគ្រុនឈាម៕
.jpg)
