ឯកឧត្តម អ៊ុន ចាន់ដា អភិបាល ខេត្តកំពង់ចាម បានអញ្ជើញពិនិត្យច្រាំងទន្លេ ដែលរងការបាក់ស្រុត នៅសង្កាត់កំពង់ចាម ខណៈក្រុមជាងកំពុងសម្រុកកសាងជើងទេរ
ខេត្តកំពង់ចាម៖អភិបាល នៃគណៈអភិបាល ខេត្តកំពង់ចាម ឯកឧត្តម អ៊ុន ចាន់ដា អមដំណើរដោយ ថ្នាក់ដឹកនាំមន្ទីរអង្គភាពពាក់ព័ន្ធ និងអាជ្ញាធរមូលដ្ឋាន នារសៀលថ្ងៃទី០៥ ខែកក្កដា ឆ្នាំ២០១៩ បានអញ្ជើញពិនិត្យច្រាំងទន្លេ ដែលរងការបាក់ស្រុត ស្ថិតនៅភូមិទី១១ សង្កាត់កំពង់ចាម ក្រុងកំពង់ចាម ខេត្តកំពង់ចាម ខណៈក្រុមជាងកំពុងសម្រុកការងារកសាងជើងទេរ និងប្រព័ន្ធជម្រាបទឹក ព្រមទាំងការងារសេសសល់ជាបន្តទៀត ដើម្បីឲ្យទាន់រដូវទឹកតំឡើងនាពេលខាងមុខនេះ។
តាមការអះអាង ពីមន្ត្រីជំនាញឲ្យដឹងថា ច្រាំងទន្លេរងការខូចខាតនេះ គឺបណ្តាលមកពីទឹកហូរចេញពីក្រោមដី ចាក់ចូលទៅទន្លេ ព្រោះកន្លងមក ពុំដែលមានករណីគ្រោះធម្មជាតិដូច្នេះឡើយ។ គ្រោះធម្មជាតិនេះ យើងមិនអាចហាមឃាត់បានទេ ពីព្រោះថា នៅតំបន់នេះ ពុំមានការធ្វើអាជីវកម្មបូមខ្សាច់ ដូចការឡើងលើកឡើង របស់សាធារណមតិមួយចំនួនឡើយ។
បើទោះបីជាមានធ្លាក់ភ្លៀងធ្លាក់ ធ្វើឲ្យប៉ះអាក់ខានដល់កិច្ចដំណើរការគម្រោងក៏ដោយ ក៏ក្រុមជាង នៅតែបន្តកិច្ចការបស់ខ្លួន ដើម្បីឲ្យទាន់រដូវទឹកឡើងឈានចូលមកដល់។
សូមបញ្ជាក់ដែរថា៖ច្រាំងដែលបានស្រុតនោះមានទំហំទទឹង៤ម៉ែត្រ និងបណ្ដោយ១៦០ម៉ែត្រ បណ្តាលឲ្យខូចខាតឥតការ៉ូ នៃសួនច្បារ អស់មួយចំណែកផងដែរ ហើយបច្ចុប្បន្ននេះ គម្រោងស្ថិតក្នុងតំបន់ខាងលើ កំពុងដំណើរការកសាង និងជួសជុលឡើងវិញ សម្រេចបានលទ្ធផលប្រមាណជាង៤០% ហើយ៕
