អភិបាលខេត្តព្រះវិហារ អំពាវនាវឲ្យបញ្ឈប់នូវរាល់សកម្មភាព បំផ្លិចបំផ្លាញធនធានធម្មជាតិ ព្រៃឈើ និងសត្វព្រៃ ជាពិសេសកាប់រានហ៊ុំព័ន្ធដីព្រៃធ្វើជាកម្មសិទ្ធ
ខេត្តព្រះវិហារ៖នាព្រឹកថ្ងៃទី០៤ ខែកក្កដា ឆ្នាំ២០១៩ ឯកឧត្តម ប្រាក់ សុវណ្ណ អភិបាល នៃគណៈអភិបាលខេត្តព្រះវិហារ ឯកឧត្តម ឡុង សុវណ្ណ ប្រធានក្រុមប្រឹក្សាខេត្ត បានអញ្ជើជាអធិបតីក្នុងពិធី អបអរសាទរពិធីរុក្ខទិវា ៩ កក្កដា ២០១៩ ដែលប្រព្រឹត្តទៅនៅក្នុងវត្តឃោសិតារាម (ហៅវត្តពាក់ស្បែក) ស្ថិតនៅក្នុងភូមិពាក់ស្បែក ឃុំរំដោះស្រែ ស្រុកជាំក្សាន្ត ខេត្តព្រះវិហារ ដោយមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត មេបញ្ជាការកងកម្លាំងទាំង៣ ប្រធានមន្ទីរអង្គភាពជុំវិញខេត្តអភិបាលក្រុងស្រុក លោកគ្រូ អ្នកគ្រូ សិស្សានុសិស្ស យុវជន សហភាសហព័ន្ធយុវជនកម្ពុជា ខេត្តជាច្រើនរូបផងដែរ។
ក្នុងឱកាសនោះឯកឧត្តម ប្រាក់ សុវណ្ណ បានអំពាវនាវដល់បងប្អូនប្រជាពលរដ្ឋ មន្រ្តីរាជការ កងកម្លាំងប្រដាប់អាវុធ ត្រូវយកចិត្តទុកដាក់អនុវត្តឲ្យបានម៉ឹងម៉ាត់ នូវបទបញ្ជាលេខ០១,០២ និងសារាចរណ៍០២របស់ប្រមុខរាជរដ្ឋាភិបាល ដោយត្រូវបញ្ឈប់នូវរាល់សកម្មភាពទាំងឡាយណា ដែលនាំទៅដល់ការបំផ្លិចបំផ្លាញធនធានធម្មជាតិព្រៃឈើ សត្វព្រៃ ជាពិសេសកុំកាប់រានហ៊ុព័ទ្ធដីព្រៃ ធ្វើជាកម្មសិទ្ធតទៅទៀត ហើយនាំគ្នាចូលរួមដាំដើមឈើ ឲ្យបានជាអតិបរមា និងត្រូវបណ្តុះគំនិតស្រលាញ់ព្រៃឈើ ថែរក្សាការពារព្រៃឈើ ដើម្បីជាឧត្តមប្រយោជន៍របស់ជាតិយើងទាំងអស់គ្នា៕
