ឯកឧត្តម អ៊ុំ រាត្រី ចុះពិនិត្យប្រព័ន្ធលូរំដោះទឹក និងគម្រោងធ្វើសួនច្បារ នៅមាត់ស្ទឹងសិរីសោភ័ណ
ខេត្តបន្ទាយមានជ័យ៖នាល្ងាចថ្ងៃទី០៣ ខែកក្កដា ឆ្នាំ២០១៩ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកហ៊ឹល រ៉ាយ៉ា អភិបាលក្រុងសិរីសោភ័ណ បានដឹកនាំរដ្ឋបាលខេត្ត រដ្ឋបាលក្រុងសិរីសោភ័ណ និងអ្នកម៉ៅការចុះពិនិត្យប្រព័ន្ធលូរំដោះទឹកភ្លៀង និងគម្រោងធ្វើសួនច្បារ នៅមាត់់ស្ទឹងសិរីសោភ័ណ ស្ថិតនៅក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ឯកឧត្តម អ៊ុំ រាត្រី បានប្រាប់អ្នកយកព័ត៌មានឲ្យដឹងថា ឯកឧត្តមចង់ឲ្យលោក តាន់ គឹមហួត នៃក្រុមហ៊ុនតាន់ គឹមអេង អ៊ិនវេសម៉ិន ខូអិលធីឌី ធ្វើការសាងសង់សំណង់ និងប្រព័ន្ធលូរំដោះទឹកភ្លៀង និងប្រព័ន្ធចម្រោះទឹកស្អុយមុនបង្ហូរចូលក្នុងស្ទឹងសិរីសោភ័ណ មានទីតាំងក្រោយសាលាគរុកោសល្យ និងវិក្រឹត្យការខេត្តនាភូមិ៣ សង្កាត់ព្រះពន្លាឲ្យមានគុណភាព និងបញ្ហាធ្វើច្រាំងនៅមាត់ស្ទឹងផង។
ប្រព័ន្ធទាំងនោះហើយដែលជាច្រករំដោះទឹក ដែលលិចលង់ជាប្រចាំនៅម្តុំប្លុកបេនឡានចាស់ ពិនិត្យមើលការរៀបចំច្រាំងមាត់ស្ទឹងសិរីសោភ័ណនាពេលកន្លងមកផង។
ឯកឧត្តម អ៊ុំ រាត្រី បានបញ្ជាក់ឲ្យដឹងទៀតថា៖យោងការណែនាំពីថ្នាក់លើនិងផែនការរបស់ខេត្ត រដ្ឋបាលខេត្ត នឹងត្រូវរៀបចំកសាងជាសួនច្បារអមមាត់ស្ទឹងសិរីសោភ័ណម្ខាង ត្រើយខាងលិច ចំងាយពីស្ពានឈើចាស់ស្ពាន សម្តេចក្រុមព្រះកាត់ប្លុកដីមាត់ស្ទឹងស្ពានថ្ម សម្តេចតេជោក្នុងភូមិ៣ មកដល់វត្តចមសុទ្ធាវាសហៅវត្តស្វាយចាស សង្កាត់ព្រះពន្លាក្រុងសិរីសោភ័ណផងដែរ ។
ឯកឧត្តមបន្តទៀតថា បំណងនោះគឺដើម្បីរៀបចំឲ្យក្លាយទៅជាកន្លែងលេងកម្សាន្ត ហាត់ប្រាណ របស់ប្រជាពលរដ្ឋ និង កែលម្អសោភ័ណភាព សណ្តាប់ធ្នាប់សាធារណៈក្រុងសិរីសោភ័ណ ក៍ដូចខេត្តបន្ទាយមានជ័យតែម្តង៕
..សូមរំលឹកថា ទីតាំងដែលគ្រោងកសាងសួនច្បារនិងកន្លែងហាត់ប្រាណនោះនោះ ជាផ្នែកមួយនៃទីតាំងចាក់ដីចូលក្នុងស្ទឹងសិរីសោភ័ណនៅម្តុំខាងក្រោយសាលាគរុកោសល្យនិងវិក្រឹត្យការខេត្ត ដល់វត្តស្វាចាស់ផងដែរ ៕
