បើកការដ្ឋាន ជួសជុលផ្លូវជាតិលេខ៣៣(R5/U5) ប្រវែង៥០០ម៉ែត្រ នៃភូមិសាស្ត្រខេត្តកែប
ខេត្តកែប៖នៅព្រឹកថ្ងៃទី៣១ ខែកក្កដា ឆ្នាំ២០១៩នេះ មន្ទីរសាធារណការ និងដឹកជញ្ជូនខេត្តកែប បានបើកការដ្ឋានជួសជុលផ្លូវជាតិលេខ៣៣ (R5/U5)ប្រវែងសរុប៥០០ម៉ែត្រ ស្ថិតក្នុងភូមិសាស្ត្រក្រុងកែប ខេត្តកែប ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប។
យោងតាមរបាយការណ៍របស់ លោក ហ៊ូ ផល្លារ៉ាវី អនុប្រធានមន្ទីរសាធារណការ និងដឹកជញ្ជូនខេត្តកែប បានឲ្យដឹងថា បច្ចុប្បន្នក្រសួងសាធារណការ និងដឹកជញ្ជូន បានអនុញ្ញាតឲ្យមន្ទីរសាធារណការនិងដឹកជញ្ជូនខេត្តកែប ធ្វើការស្ថាបនាឡើងវិញផ្លូវជាតិលេខ៣៣ (R5/U5) ចន្លោះ គ.ម ១៨+១០០ ដល់ គ.ម ៦០០ ដែលមានប្រវែងសរុប ៥០០ គ.ម និងផ្លូវតភ្ជាប់ប្រវែង៣៦០ម៉ែត្រ ដោយចាក់អ៊ុតបេតុងកៅស៊ូ A/C ទំហំ១៩.០៤០ ម៉ែត្រការេ ,ការងាររៀបខឿនបេតុងប្រវែង៧២០ម៉ែត្រ គំនូសផ្លូវ ១.០៦២ម៉ែត្រការេ និងស្ថាបនាលូមូលបេតុងមុខកាត់១ម៉ែត្រ ប្រវែង ៩០០ម៉ែត្រ ដោយត្រូវប្រើរយៈពេលសាងសង់ប្រហែល១ឆ្នាំ ដោយគិតចាប់ពីថ្ងៃបើកការដ្ឋាននេះតទៅ។
មានមតិសំណេះសំណាលក្នុងឱកាសនោះ លោក កែន សត្ថា អភិបាលខេត្តកែប បានមានប្រសាសន៍ដោយជំរុញដល់បងប្អូនប្រជាពលរដ្ឋឲ្យមានកិច្ចសហការ ដើម្បីពង្រីកចិញ្ចើមផ្លូវជាតិលេខ៣៣ឲ្យបានធំទូលាយ។
ជាមួយគ្នានេះ លោកអភិបាលខេត្តក៏បានសំណូមពរដល់បងប្អូនប្រជាពលរដ្ឋត្រូវត្រូវចូលរួមថែរក្សាផ្លូវថ្នល់ដែលជាសម្បតិ្តសាធារណៈ ឲ្យបានស្ដិតស្ថេរយូរអង្វែងសម្រាប់បន្តដល់កូនចៅជំនាន់ក្រោយ ហើយបើបានផ្លូវកៅស៊ូស្អាតបែបនេះ បងប្អូនត្រូវធ្វើដំណើរដោយប្រុងប្រយ័ត្ន ដាច់ខាតកុំឲ្យមានករណីគ្រោះថ្នាក់ចរាចរកើតឡើង ព្រោះថាករណីគ្រោះថ្នាក់ចរាចរវាផ្តើមឡើងដោយសារកត្តាមនុស្សទាំងអស់ ដាច់ខាតមិនមែនដោយសារផ្លូវស្អាតរលើបរលោងនោះឡើយ៕