រដ្ឋបាលខេត្តកំពត ប្រារព្ធពិធីអបអរសាទរ "រុក្ខទិវា" ៩ កក្កដា ២០១៩
ខេត្តកំពត៖នាព្រឹកថ្ងៃអង្គារ ១៤រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣០ ខែកក្កដា ឆ្នាំ២០១៩ រដ្ឋបាលខេត្តកំពត បានរៀបចំពិធីអបអរសាទរ "រុក្ខទិវា" ៩ កក្កដា ២០១៩ នៅបរិវេណពហុកីឡដ្ឋានខេត្ត ក្រោមអធិបតីភាពដ៏ខ្ពង់ខ្ពស់ លោក ជាវ តាយ អភិបាល នៃគណៈអភិបាលខេត្តកំពត និងលោក ជឹង ផល្លា ប្រធានក្រុមប្រឹក្សាខេត្តកំពត។
អញ្ជើញចូលរួមក្នុងពិធីនេះរួមមាន លោក លោកស្រី សមាជិកក្រុមប្រឹក្សាខេត្ត អភិបាលរងខេត្ត លោក លោកស្រីប្រធានមន្ទីរ អង្គភាព ជុំវិញខេត្ត កងកម្លាំងទាំងបីប្រភេទ ក្រុមប្រឹក្សាក្រុង សង្កាត់ សិស្សនិស្សិត យុវជន កាយរឹទ្ធ យុវជនកាកបាទក្រហម និងប្រជាពលរដ្ឋ សិស្សានុសិស្ស សរុប ១៥៩៥នាក់។
តាមរបាយការណ៍របស់ លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពតបានឲ្យដឹងថា ក្នុងពិធីបុណ្យរុក្ខទិវា ៩កក្កដា ឆ្នាំ២០១៩ដែលត្រូវបានប្រារព្ធឡើងនៅក្នុងបរិវេណពហុកីឡដ្ឋានខេត្តកំពតនាពេលនេះ គឺត្រូវដាំដើមឈើឆ័ត្រទេស អង្កត់ផ្ចិតទំហំ១០ស.ម ចំនួន១០ដើម ដើម ឈើធ្នង់អង្កត់ផ្ចិតទំហំពី១០-២៥ស.ម ចំនួន៣០ដើម កូនឈើប្រភេទគ្រញូងចំនួន១០០ដើម នាងនួន១០០ដើម ធ្នង់៥០ដើម កូនគគីរ១០០ដើម និងដើមរំដួលចំនួន១០០ដើម ដោយបានដាំនៅតាមដងផ្លូវនានាក្នុងភូមិសាស្ត្រក្រុងកំពត សរុប ៦១០ដើម ក្នុងគោលបំណងបង្កើននូវសោភ័ណភាពក្នុងក្រុងរបស់យើងឲ្យមានលក្ខណៈស្រស់បំព្រង។
លោកប្រធានមន្ទីរ បានបញ្ជាក់ទៀតថា ក្នុងនោះដែរយើងក៏មានកូនឈើប្រភេទប្រណិតៗមួយចំនួនទៀត សម្រាប់ចែកចាយជូនអង្គភាពរដ្ឋ សាលារៀន វត្តអារាម និងប្រជាពលរដ្ឋចំនួន ៤០០ដើមទៀត ដូចជាកូនគគីរ ១០០ដើម ឈើទាល១០០ដើម គ្រញូង១០០ដើម ធ្នង់៥០ដើម និងនាងនួន៥០ដើម សរុបទាំងអស់ស្មើនឹង១.០១០ដើម។
ក្នុងឱកាសដ៏ថ្លៃថ្លានេះ លោក ជាវ តាយ អភិបាលខេត្តកំពត បានមានប្រសាសន៍ថា ព្រឹត្តិការណ៍បុណ្យរុក្ខទិវាថ្ងៃនេះបង្ហាញឲ្យឃើញនូវការភ្ញាក់រលឹក និងចូលរួមយ៉ាងសកម្ម ការពារ និងបង្កើនធនធានព្រៃឈើដ៏មានតម្លៃ។ដោយខណៈនោះលោកក៏បាន ផ្តាំផ្ញើដល់មន្ទីរកសិកម្ម រុក្ខាប្រមាញ់ និងនេសាទ ខណ្ឌរដ្ឋបាលព្រៃឈើកំពត និងក្រុងកំពត ត្រូវបន្តដាំកូនឈើនៅគ្រប់ទីកន្លែងទាំងអស់ ដើម្បីបង្កើតនូវពណ៌បៃតងនិងផ្កាគ្រប់ពណ៌ សម្រាប់លម្អសោភ័ណភាពក្រុង និងដើម្បីចូលរួមប្រឡងប្រណាំងក្នុងកម្មវិធីប្រទេសអាស៊ាន ស្ដីពីសាលារៀនស្អាតនិងបរិស្ថានល្អ៕