ក្រុមប្រឹក្សាខេត្ត និងគណៈអភិបាលខេត្តសៀមរាប បានចូលរួមរំលែកទុក្ខគ្រួសារសព លោកជំទាវ ស៊ឹង ស៊ីយុត សមាជិកព្រឹទ្ធសភា
ខេត្តសៀមរាប៖កាលពីព្រឹក ថ្ងៃទី២៩ ខែកក្កដា ឆ្នាំ២០១៩ ក្រុមប្រឹក្សាខេត្ត គណៈអភិបាលខេត្តសៀមរាប បានអញ្ជើញចូលរួមរំលែកទុក្ខ និងចូលរួមបុណ្យសព លោកជំទាវ ស៊ឹង ស៊ីយុត សមាជិកព្រឹទ្ធសភា និងជាលេខាធិការគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ បានទទួលមរណភាព នៅថ្ងៃទី២៧ ខែកក្កដា ឆ្នាំ២០១៩ វេលាម៉ោង១០:០០ នាទីព្រឹក ត្រូវនឹងថ្ងៃសៅរ៍១១រោច ខែអាសាឍ ឆ្នាំកុរ ឯកស័ក ព.ស.២៥៦៣ ក្នុងជន្មាយុ៧១ ឆ្នាំ ដោយរោគាពាធ។
ក្នុងបរិយាកាសដ៏សែនក្តុកក្តួលនេះ ខ្ញុំសូមសម្តែងនូវការសោកស្តាយអាឡោះអាល័យជាអនេក និងសូមចូលរួមរំលែកទុក្ខដ៏សែនក្រៀមក្រំនេះជាមួយក្រុមគ្រួសារសព។
មរណភាពរបស់លោកជំទាវ ស៊ឹង ស៊ីយុត សមាជិកព្រឹទ្ធសភា នៃព្រះរាជាណាចក្រកម្ពុជា គឺជាការបាត់បង់ដ៏ធំធេងមិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវថ្នាក់ដឹកនាំដ៏ឆ្នើមម្នាក់ ដែលបានលះបង់អ្វីៗគ្រប់យ៉ាង ដើម្បីបុព្វហេតុជាតិ និងកិច្ចអភិវឌ្ឍន៍សេដ្ឋកិច្ចសង្គមលើគ្រប់វិស័យ និងតែងតែធ្លាប់បានយកចិត្តទុកដាក់លើការងារមនុស្សធម៌ សន្តិភាព វិបុលភាព និងវឌ្ឍនភាពជូនជាតិ មាតុភូមិ ជានិច្ចកាលលើគ្រប់កាលៈទេសៈទាំងអស់ពុំអាចបំភ្លេចបានជារៀងរហូត៕
