បញ្ជូនមន្ដ្រីរដ្ឋបាលព្រៃឈើ និងមន្ដ្រីបរិស្ថានចំនួន៣នាក់ នៅខេត្តមណ្ឌលគិរី ទៅតុលាការពាក់ព័ន្ធបទល្មើសព្រៃឈើ
ខេត្តមណ្ឌលគិរី៖សេចក្តីរាយការណ៍បានឲ្យដឹងថា៖នៅរសៀលថ្ងៃសៅរ៍ ១១រោច ខែអាសាឍ ឆ្នាំកុរ ឯកស័កព.ស២៥៦៣ ត្រូវថ្ងៃទី២៧ ខែកក្កដាឆ្នាំ២០១៩ កម្លាំងគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជូនខ្លួនមន្ដ្រីចំនួន៣នាក់ទៀត រួមមាន មន្ដ្រីរដ្ឋបាលព្រៃឈើចំនួន២រូប និងមន្ដ្រីបរិស្ថាន១នាក់ នៅខេត្ដមណ្ឌលគិរី ទៅតុលាការដើម្បីចាត់ការបន្ដតាមនីតិវិធី ពាក់ព័ន្ធទៅនឹងបទល្មើសព្រៃឈើ បន្ទាប់ពីឃាត់ខ្លួន និងបញ្ចប់ការសួរ។
សេចក្តីរាយការណ៍បន្តថា៖មន្ដ្រីទាំង៣រូប ដែលត្រូវសមត្ថកិច្ចចាប់ខ្លួនកាលពីថ្ងៃទី២៦ ខែកក្កដា ឆ្នាំ២០១៩រួមមាន៖
-ទី១-លោក ហាន សាខន អាយុ៤៨ឆ្នាំ មានតួនាទីជា នាយកដែនជម្រកសត្វព្រៃភ្នំព្រេច លំផាត់។
-ទី២-លោក សារូ រតនា អាយុ៤៦ឆ្នាំ នាយករងរដ្ឋបាលព្រៃឈើ។
-ទី៣-លោក ហ៊ុន វណ្ណេ អាយុ៥៣ឆ្នាំ នាយសង្កាត់រដ្ឋបាលព្រៃឈើរយ៉ ក្នុងស្រុកលំផាត់។
លោកឧត្តមសេនីយ៍ត្រី អេង ហ៊ី អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានបញ្ជាក់ប្រាប់អ្នកសារព័ត៌មានថា មន្ដ្រីទាំង៣រូបនេះ ជាប់ពាក់ព័ន្ធបទល្មើសព្រៃឈើជាមួយ ក្រុមហ៊ុនប៉ាស៊ីហ្វិក ដែលក្នុងនោះ ក៏ជាប់ពាក់ព័ន្ធជាមួយក្រុមជនជាតិវៀតណាម ដែលត្រូវតុលាការសម្រេចឃុំខ្លួនដាក់ពន្ធនាគារនោះផងដែរ៕
