ឯកឧត្តម ជាវ តាយ អញ្ជើញជួបសំណេះសំណាល ជាមួយមន្ត្រីគណបក្សប្រជាជន ស្រុកឈូក ខេត្តកំពត
ខេត្តកំពត៖នៅព្រឹកថ្ងៃទី២៧ ខែកក្កដា ឆ្នាំ២០១៩ ឯកឧត្តម ជាវ តាយ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្ត បានអញ្ជើញជួបសំណេះសំណាលជាមួយមន្ត្រី គណបក្សប្រជាជនកម្ពុជា នៅក្នុងស្រុកឈូក ខេត្តកំពត។
ក្នុងពិធីនេះដែរ មានការចូលរួមពីសមាជិក សមាជិកាគណៈកម្មាធិការគណបក្សស្រុកឈូក សមាជិក សមាជិកាក្រុមប្រឹក្សាស្រុក មិនមែនជាសមាជិកគណៈកម្មាធិការគណបក្សស្រុក មេឃុំមិនមែនជាសមាជិកគណៈកម្មាធិការគណបក្សស្រុក ប្រធានការិយាល័យជុំវិញស្រុកមិនមែនជាសមាជិកគណៈកម្មាធិការគណបក្សស្រុក ស្មៀនឃុំ និងនាយប៉ុស្តិ៍រដ្ឋបាលឃុំ សរុបចំនួន ១២៣នាក់ ។
មានប្រសាសន៍សំណេះសំណាល ឯកឧត្ដម ជាវ តាយ បានលើកនូវចំណុចសំខាន់ៗ ពីការងារមួយចំនួនទាំងការងារបក្ស និងរដ្ឋបាល រួមមាន៖
- សំណូមពរអោយអង្គពិធីនេះ ជាវេទិកាមានការចូលរួមមតិយោបល់លើកឡើងពីមន្ត្រីពាក់ព័ន្ធ ពីបញ្ហាផ្សេងៗ ក្នុងមូលដ្ឋាន ដើម្បីជំរុញរកដំណោះស្រាយ និងការអនុវត្តកែលំអអោយបានកាន់តែមានប្រសិទ្ធភាពថែមទៀត។
- ឯកឧត្តមបានកោតសរសើរដល់មន្ត្រីដែលមានការយកចិត្តទុកដាក់លើការងារអភិវឌ្ឍន៍ និងការងារបម្រើសេវារដ្ឋបាលជូនប្រជាពលរដ្ឋបានល្អកន្លងមក ស្របតាមកម្មវិធីនយោបាយគណបក្ស ក៏ដូចជាគោលនយោបាយយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែនជានាយករដ្ឋមន្ត្រី។
- ពាក់ព័ន្ធការកសាងកម្លាំងនិងរៀបចំថ្នាក់ដឹកនាំគណបក្សនៅមូលដ្ឋាន ឯកឧត្តមក៏បានបញ្ជាក់ថា ត្រូវតែមានការកែប្រែ និងនៅតែបន្តជំរុញនូវតម្លាភាព ពិសេសចំពោះមន្ត្រីសកម្មការងារ ត្រូវតែមានការយកចិត្តទុកដាក់គិតគូរជាចាំបាច់ ពិសេសទៀតនោះ គឺការកសាងកម្លាំងបក្សក្នុងស្រទាប់យុវជនដែលជាអ្នកបន្តវេន។
- ឯកឧត្តមប្រធានគណបក្សខេត្ត ក៏បានណែនាំដល់មន្ត្រីត្រូវបន្តរក្សាការសាមគ្គីភាពល្អ និងយកចិត្តទុកដាក់ជំរុញបង្កើនលើការងារអភិវឌ្ឍន៍មូលដ្ឋាន ដែលមានរដ្ឋបាលខេត្តចូលរួមជួយគាំទ្រ ក៏ដូចជាការងារបម្រើសេវារដ្ឋបាលជូនប្រជាពលរដ្ឋ ក៏ត្រូវតែមានការយកចិត្តទុកដាក់បន្ថែមទៀតជាពិសេសក្នុងនោះបញ្ហាពាក់ព័ន្ធដីធ្លី និងសំណង់ ក៏ត្រូវតែបង្កើនការយកចិត្តទុកដាក់ជាសំខាន់ ដោយមិនត្រូវទុកអូសបន្លាយបញ្ហានៅតែបន្តដដែលៗទៀតទេ។
ក្នុងឱកាសនេះដែរ ឯកឧត្តមប្រធាន បានឧបត្ថម្ភដល់ថវិកាសរុប ៥,៤៥០,០០០រៀល ដល់សមាជិក សមាជិកាគណៈកម្មាធិការគណបក្សស្រុក ឃុំ ចំនួន ១០៩នាក់ ដោយម្នាក់ៗទទួលបានថវិកា ៥ម៉ឺនរៀល៕
