សត្វជ្រូកជាច្រើនក្បាល ដែលឈ្មួញលួចដឹក ពីប្រទេសវៀតណាម ឆ្លងកាត់ជាច្រើនខេត្ត មកលក់ក្នុងខេត្តបន្ទាយមានជ័យ ត្រូវបានជំនាញពេទ្យសត្វចុះបង្ក្រាប
ខេត្តបន្ទាយមានជ័យ៖ដោយមានការព្រួយបារម្ភខ្លាចការឆ្លងមេរោគប៉េស្តជ្រូកអាហ្វ្រិច ដល់ប្រជាពលរដ្ឋ នាព្រឹកថ្ងៃទី០១ ខែកក្តដា ឆ្នាំ២០១៩ មន្ត្រីពេទ្យសត្វស្រុក និងពេទ្យសត្វខេត្តបន្ទាយមានជ័យ បានឃាត់រថយន្តដឹកសត្វជ្រូក១គ្រឿង ខណៈដែលនាំពីប្រទេសវៀតណាម ចូលមកប្រទេសកម្ពុជាឆ្លងកាត់ជាច្រើនខេត្ត មកដល់ព្រំដែនកម្ពុជា ថៃខាងលិចនៃប្រទេស ក្នុងខេត្តបន្ទាយមានជ័យ។
លោកហ៊ុយ ទូច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា៖ការឃាត់រថយន្តលួចដឹកជ្រូក ពីប្រទេសវៀតណាមនេះមានម៉ាក់ហ៊ីយានដាយ កង់៦ឆ្លងដែនពីវៀតណាមឆ្លងកាត់ជាច្រើនខេត្ត បំរុងមកចែកចាយនៅបន្ទាយមានជ័យ ត្រូវបានកម្លាំងជំនាញពេទ្យសត្វ នៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ឃាត់ចាប់បានកាលពីសៀល ថ្ងៃទី០១ ខែកក្ដដា ឆ្នាំ២០១៩ នៅចំណុចផ្លូវបំបែក ស្ថិតនៅក្នុងភូមិបន្ទាយឆ្មារកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។
លោកហ៊ុយ ទូច បានបញ្ជាក់ឲ្យដឹងទៀតថា៖ពាក់ពន្ធ័នឹងការដឹកជញ្ជូនសត្វជ្រូកលួចនាំពីប្រទេសវៀតណាមនេះដែលបារម្ភពីការឆ្លងជម្ងឺប៉េស្តជ្រូកអាហ្វ្រិចឆ្លងដែនបំរុងមកចែកចាយក្នុងភូមិសាស្រ្តខេត្តបន្ទាយមានជ័យនេះ មន្ត្រីជំនាញពេទ្យសត្វក៏បានទទួលការណែនាំ ពីថ្នាក់លើតាមខ្សែបណ្តោយ ការណែនាំពីលោក អ៊ុំ រាត្រី អភិបាលខេត្ត និងជាប្រធានគណ:បញ្ជារការកងឯកភាព ខេត្តបន្ទាយមានជ័យ និងក៏មានការសម្របសម្រួលពីលោក មាស ច័ន្ទពិសិដ្ឋ ព្រះរាជ្ញាអមអយ្យការសាលាដំបូងខេត្តផងដែរ។
លោកហ៊ុយ ទូច បានបញ្ជាក់ឲ្យដឹងទៀតថា៖រថយន្តនោះបានដឹកជ្រួកសាច់ចំនួន៤០ក្បាល ក្នុងនោះងាប់លើឡាន៣ក្បាល ហើយបានលួចដឹកចេញពីព្រំដែនវៀតណាម ជាទីដែលផ្ទុះករណីជម្ងឺប៉េស្តិ៍ជ្រូកអាហ្វ្រិច ហើយឆ្លងកាត់ខេត្តក្រចេះ ស្ទឹងត្រែង ព្រះវិហារ ឧត្តរមានជ័យមកដល់ខេត្តបន្ទាយមានជ័យតែម្តង។
ចំពោះមុខ មន្ត្រីពេទ្យសត្វបានឃាត់រថយន្ត និងអ្នកបើកទុកនៅការិយាល័យ ហើយរក្សាជ្រូកទុកមួយរយ:ពេលតាមវិធានការពេទ្យសត្វ។ក្នុងនោះបានបូមឈាមជ្រូកយកធ្វើសំណាក់វិភាគបញ្ជូនទៅមន្ទីរពិសោធន៍ នៃអគ្គនាយកដ្ឋានផលិតកម្ម និងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ ដើម្បីពិសោធន៍រកមេររោគចម្លងនានា រួមទាំងប៉េស្តជ្រូកអាហ្វ្រិច ដែលបង្កគ្រោះថ្នាក់ដល់សុខភាពប្រជាពលរដ្ឋយ៉ាងខ្លាំងផងដែរ៕
.jpg)
