លោក វេង សាខុន ស្នើឲ្យអាជ្ញាធរមូលដ្ឋាន ចុះផ្សព្វផ្សាយស្តីអំពីវិធានការបង្ការ និងទប់ស្កាត់ជំងឺគ្រុនឈាម
ខេត្តត្បូងឃ្មុំ៖លោក វេង សាខុន ប្រធានក្រុមការងារថ្នាក់ជាតិ ចុះជួយស្រុកតំបែរ ខេត្តត្បូងឃ្មុំ ស្រុកកំពង់សៀម និងស្រុកជើងព្រៃ ខេត្តកំពង់ចាម បានស្នើដល់លោកគ្រូ អ្នកគ្រូពេទ្យទូទាំងខេត្ត អាជ្ញាធរមូលដ្ឋាន ក្រុមការងារថ្នាក់កណ្តាលចុះជួយភូមិ ឃុំ ស្រុកតំបែរ និងសមាជិក សមាជិកាទាំងអស់ ត្រូវបង្កើនសកម្មភាពផ្សព្វផ្សាយ នៅតាមភូមិ ឃុំ សាលារៀន ទីវត្តអារ៉ាម វិហ៊ារ និងអប់រំចល័ត ស្តីពីវិធានការបង្ការជំងឺគ្រុនឈាម បំផុស និងលើកទឹកចិត្តចលនាចូលរួមរបស់ប្រជាជនឲ្យបានសកម្ម ក្នុងការអនុវត្តសកម្មភាពលុបបំបាត់ប្រភពកកើតមូស និងដង្កូវទឹក រាល់កន្លែងដែលមានទឹកដក់ថ្លា សំបកកង់ឡាន កង់ម៉ូតូ កំប៉ុង ដប ចានស្នោ ពាងទឹក និងវត្ថុអាចដក់ទឹកបានផ្សេងៗ។
មានប្រសាសន៍បែបនេះក្នុងឱកាសដែលលោក និងសហការី អញ្ជើញចុះពិនិត្យស្ថានភាពជំងឺគ្រុនឈាម នៅមន្ទីរពេទ្យបង្អែក ស្រុកតំបែរ ខេត្តត្បូងឃ្មុំ និងនាំយកនូវអំណោយរបស់សម្តេចតេជោ សម្តេចកិត្តិព្រឹទ្ធបណ្ឌិត សម្តេចសេនាភក្តី សម្តេចពញាចក្រី ក្រុមការងារថ្នាក់កណ្តាលចុះជួយស្រុកតំបែរ និងព្រះតេជគុណ ព្រះចៅអធិការវត្តនានា ជូនដល់គ្រួសារក្រីក្រចំនួន ១៣៥គ្រួសារ។ពិធីនេះ បានប្រព្រឹត្តទៅនៅព្រឹកថ្ងៃទី២៧ ខែកក្កដា ឆ្នាំ២០១៩នៅទីស្នាក់ការគណបក្សប្រជាជនកម្ពុជា។
ពាក់ព័ន្ធនឹងជំងឺគ្រុនឈាម ដែលជាជំងឺកាចសាហាវមួយ លោកប្រធានបានថ្លែងថា មូសខ្លាគឺជាភ្នាក់ងារតែមួយមុខគត់ ចម្លងនូវជំងឺគ្រុនឈាមដល់បុត្រធីតា និងគ្រួសារដែលអាចបណ្ដាលឲ្យគ្រោះថ្នាក់ដល់ជីវិត។
ដើម្បីដោះស្រាយនូវរាល់បញ្ហា និងភាពកង្វះខាត លោកប្រធានក្រុមការងារ ក៏បានប្រគល់ជូននូវ សេរ៉ូមចំនួន៣១០កំប្លោក ថវិកាចំនួន០៤លានរៀល សម្រាប់កសាងហេដ្ឋារចនាសម្ព័ន្ធជុំវិញមន្ទីរពេទ្យ។ឧបត្ថម្ភលោកគ្រូ អ្នកគ្រូពេទ្យនូវថវិកាចំនួន១០ម៉ីនរៀលក្នុង ០១នាក់ និងអ្នកជំងឺទាំង ៣៩នាក់ដោយក្នុងម្នាក់ៗ ទទួលបានថវិកាចំនួន៥ម៉ីនរៀលផងដែរ ដែលការឧបត្ថម្ភទាំងអស់នេះ គឺជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត។
ជាមួយគ្នានោះដែរ លោកប្រធានក្រុមការងារ ក៏ជម្រាបជូនជ្រាបផងដែរថា ក្តីបារម្ភរបស់សម្តេចមកលើសុខទុក្ខរបស់ប្រជាជន តាមរយៈសកម្មភាពមនុស្សធម៌នាព្រឹកនេះ គឺពិតជាបានឆ្លុះបញ្ចាំងពីការប្ដេជ្ញាចិត្ដរបស់សម្តេចតេជោ គឺមិនឲ្យប្រជាពលរដ្ឋខ្មែរណាម្នាក់ស្លាប់ដោយអត់ឃ្លាននោះទេ៕