សមត្ថកិច្ចខេត្តកំពត បានបំបែកសំណុំរឿងឃាតកម្ម វាយសម្លាប់មនុស្ស នៅស្រុក កំពង់ត្រាច បានហើយ
ខេត្តកំពត៖ ករណីឃាតកម្មដែលជនដៃដល់ពីរនាក់ឪពុក និងកូនបានរួមដៃគ្នាវាយសម្លាប់ជនរងគ្រោះម្នាក់ឲ្យស្លាប់យ៉ាងអណោចអធ័មនៅភូមិច្រេស ឃុំបឹងសាលាខាងត្បូង ស្រុកកំពង់ត្រាច កាលពីព្រលប់ថ្ងៃទី០២ ខែកក្កដា ឆ្នាំ២០១៩កន្លងទៅ ពេលនេះសមត្ថកិច្ច នៃស្នងការដ្ឋាននគរបាលខេត្តកំពត បានបំបែកសំណុំរឿងទទួលបានជោគជ័យ។
លោក ឈឹម ឈាង ប្រធានការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកំពត បានប្រាប់អ្នកសារព័ត៌មានឲ្យថា បន្ទាប់ពីមានករណីឃាតកម្ម បុរសពីរនាក់ឪពុកនិងកូន លបវាយសម្លាប់បុរសម្នាក់ស្ថិតក្នុងភូមិច្រេស ឃុំបឹងសាលាខាងត្បូង ស្រុកកំពង់ត្រាច លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានដាក់ទិសដៅ តម្រូវឲ្យលោកដឹកនាំកម្លាំងធ្វើការស្រាវជ្រាវស្វែងរកជនសង្ស័យគ្រប់ច្រកល្ហក ដោយខណៈនោះលោកបានសហការយ៉ាងស្អិតល្មួតរវាងស្នងការដ្ឋាននគរបាលរាជធានីភ្នំពេញ ដោយប្រើពេលវេលាជាង១០ថ្ងៃឯណោះ។
ជាលទ្ធផល នៅវេលាម៉ោង១៥និង៤០នាទីរសៀល កម្លាំងក៏ដឹងតម្រុយជនសង្ស័យជាកូន ឈ្មោះ ទេន សារ៉ូ ភេទប្រុស អាយុ២៥ឆ្នាំកំពុងលាក់ខ្លួននៅចំណុចភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ទើបនាំកម្លាំងទៅឃាត់ខ្លួននាំមកកាន់ស្នងការដ្ឋាននគរបាលខេត្តកំពត ដើម្បីស្តាប់ចម្លើយ ហើយកម្លាំងក៏នាំនៅបន្តតាមប្រមាញ់ស្រាវជ្រាវរកមុខសញ្ញាជនដៃដល់ជាឪពុកបន្តទៀត។
លោកបានបន្តថា តាមរយៈការស្រាវជ្រាវតាមជំនាញរបស់សមត្ថកិច្ច កម្លាំងក៏ឈានទៅឃាត់ខ្លួនបុរសម្នាក់ទៀតជាឪពុក ឈ្មោះឡុង រី ភេទប្រុស អាយុ៥២ឆ្នាំ កាលពីថ្ងៃទី២៥ ខែកក្កដា ឆ្នាំ២០១៩ដែលកំពុងលាក់ខ្លួននៅចំណុចវត្តថ្មដារក្រោម ក្នុងភូមិវាលធំ ឃុំវាលរេញ ស្រុកព្រៃនប់ ខេត្តព្រះសីហនុ រួចក៏នាំខ្លួនមកកាន់ស្នងការនគរបាលខេត្តកំពត ដើម្បីស្តាប់ចម្លើយ និងកសាងសំណុំរឿងអនុវត្តតាមនីតិវិធី។
នៅចំពោះមុខសមត្ថកិច្ច ជនសង្ស័យជាឪពុកបានសារភាពថា ខ្លួនពិតជាបានរួមដៃគ្នាជាមួយកូនប្រុស សម្លាប់បុរសម្នាក់ឈ្មោះ ឡី ថេង អាយុ៥២ឆ្នាំ នៅចំណុចផ្លូវលំស្ថិតក្នុងភូមិច្រេស ឃុំបឹងសាលាខាងត្បូង ស្រុកកំពង់ត្រាច ខេត្តកំពត ប្រាកដមែន ដោយសារខ្លួនខឹងនឹងជនរងគ្រោះ ចោទប្រកាន់ខ្លួនថាចេះធ្វើអំពើអាបធ្មប់។
បច្ចុប្បន្នជនសង្ស័យត្រូវបានសមត្ថកិច្ចការិយាល័យព្រហ្មទណ្ឌកម្រិតធ្ងន់ខេត្ត កសាងសំណុំរឿងបញ្ជូនទៅកាន់សាលាដំបូងខេត្តកំពត ចាត់ការតាមផ្លូវច្បាប់។
សូមបញ្ជាក់ថា កាលពីថ្ងៃទី០២ ខែកក្កដា ឆ្នាំ២០១៩ វេលាម៉ោង១៦និង៣០នាទីព្រលប់ មានករណីឃាតកម្មកើតឡើងនៅចំណុចភូមិច្រេស ឃុំបឹងសាលាខាងត្បូង ស្រុកកំពង់ត្រាច ខេត្តកំពត ដែលបណ្តាលឲ្យជនរងគ្រោះម្នាក់ឈ្មោះ ឡី ថេង ភេទប្រុស អាយុ៥២ឆ្នាំស្លាប់ក្នុងថ្លុកឈាមនៅកន្លែងកើតហេតុ។
ចំពោះករណីឃាតកម្មនេះ បើតាមសមត្ថកិច្ចមូលដ្ឋានបានបញ្ជាក់ថា ជនរងគ្រោះត្រូវបុរសពីរនាក់(ឪពុកនិងកូន)លបវាយសម្លាប់នៅចំណុចផ្លូវលំមួយ ដោយប្រើចបជីកជាអាវុធ ខណៈពេលជនរងគ្រោះជិះម៉ូតូឆ្លងកាត់ម្នាក់ឯង ហើយជនសង្ស័យទាំងពីរនាក់ក៏ជិះម៉ូតូគេចខ្លួនបាត់ស្រមោល។ប្រភពបានបន្តថា ជនសង្ស័យជាឪពុក ឈ្មោះ ឡុង រី អាយុ៥២ឆ្នាំ និងជនសង្ស័យជាកូនប្រុស ឈ្មោះ ទេន សារ៉ូ អាយុ២៥ឆ្នាំ ទាំងពីរនាក់រស់នៅភូមិ ឃុំ កើតហេតុខាងលើ៕