ជនបរទេសម្នាក់ ខណៈបើកម៉ូតូពេលយប់ ត្រូវរថយន្តបុក បណ្តាលឲ្យរងរបួសធ្ងន់
ខេត្តកំពត៖ជនបរទេសម្នាក់បានទទួលគ្រោះថ្នាក់យ៉ាងដំណំ ដោយសាររថយន្តជ្រុលទៅបុកចំពីមុខពេញទំហឹង ខណៈពេលជនរងគ្រោះបើកម៉ូតូនៅពេលយប់ម្នាក់ឯង។
ហេតុការណ៍ដ៏រន្ធត់នេះ បានកើតឡើងកាលពីវេលាម៉ោង០០,២៥នាទីរំលងអធ្រាត ឈានចូលថ្ងៃទី២៦ ខែកក្កដា ឆ្នាំ២០១៩ ត្រង់ចំណុចលើស្ពានថ្មីព្រែកកំពង់បាយ ចន្លោះគីឡូម៉ែត្រ១៤៨-១៤៩ ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត។
តាមប្រភពព័ត៌មានពីមន្ត្រីនគរបាលចរាចរណ៍ បាននិយាយថា ជនរងគ្រោះមានឈ្មោះ TIMO THEE ភេទប្រុស អាយុ២២ឆ្នាំ(របួសធ្ងន់) ជាជនជាតិបារាំង ស្នាក់នៅផ្ទះជួលនៅភូមិកំពង់ក្រុង ឃុំកំពង់គ្រែង ស្រុកទឹកឈូ ខេត្តកំពត។
ប្រភពដដែលបានបន្តថា មុនពេលកើតហេតុជនរងគ្រោះជិះម៉ូតូឡើងស្ពានមកពីលិចទៅកើត លុះមកដល់ចំណុចលើស្ពានក៏មានរថយន្តកូរ៉េចំណុះ១,៥តោន ពណ៌សមួយគ្រឿងបានបើកជែងរថយន្តផ្សេងទៀតទើបជ្រុលទៅបុកម៉ូតូរបស់ជនជាតិបារាំងចំពីមុខពេញទំហឹងបណ្តាលឲ្យរងរបួសធ្ងន់ព្រមទាំងខូចខាតម៉ូតូយ៉ាងធ្ងន់ធ្ងរ ហើយរថយន្តបានបើកគេចទៅទិសខាងលិចបាត់ស្រមោលឈឹង។
ក្រោយពីកើតហេតុជនរងគ្រោះ ត្រូវបានសមត្ថកិច្ចហៅរថយន្តសាមុយដើម្បីដឹកទៅសង្គ្រោះនៅឯមន្ទីរពេព្យភ្នំពេញទាំងយប់ ព្រោះតែជនរងគ្រោះមានស្ថានភាពធ្ងន់ធ្ងរមិនធម្មតា៕