នាយឧត្តមសេនីយ៍ គន់ គីម អញ្ជើញជាអធិបតីក្នុងកិច្ចប្រជុំ ស្តីពីការត្រួតពិនិត្យការងារ ត្រៀមបង្ការ និងសង្រ្គោះ គ្រោះមហន្តរាយ នៅសាលាខេត្តបាត់ដំបង
ខេត្តបាត់ដំបង៖នាព្រឹកថ្ងៃទី២៦ ខែកក្កដា ឆ្នាំ២០១៩ នាយឧត្តមសេនីយ៍ គន់ គីម ទេសរដ្ឋមន្រ្តីទទួលបន្ទុកបេសកកម្មពិសេសនិងជាអនុប្រធានទី១ គណ:កម្មាធិការជាតិគ្រប់គ្រងគ្រោះមហន្តរាយ បានអញ្ជើញជាអធិបតីក្នុងកិច្ចប្រជុំស្តីពីការត្រួតពិនិត្យការងារត្រៀមបង្ការ និងសង្រ្គោះ គ្រោះមហន្តរាយនៅសាលាខេត្តបាត់ដំបង ឯកឧត្តម ងួន រតនៈ អភិបាល នៃគណៈអភិបាលខេត្ត លោក ឡាំ ហេងហួត អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ និងថ្នាក់ដឹកនាំកងកម្លាំងទាំង៣ប្រភេទ ព្រមទាំងក្រុមការងារគណៈកម្មាធិការជាតិគ្រប់គ្រងគ្រោះមហន្តរាយខេត្ត ក្រុងស្រុកឃុំ ថ្នាក់ដឹកនាំមន្រ្តីរាជការ មន្ទីរ អង្គភាពនានាក្នុងខេត្តចូលរួមប្រមាណជាង៣០០នាក់។
បន្ទាប់ពីឯកឧត្តម ងួន រតនៈ អភិបាល នៃគណៈអភិបាលខេត្ត បានឡើងអានរបាយការណ៍ស្វាគមន៍ស្តីពីលទ្ធផលការងារគ្រប់គ្រងគ្រោះមហន្តរាយខេត្ត ដែលបានកើតឡើងរយៈពេល៦ខែដើមឆ្នាំ២០១៩កន្លងមក បាននិងកំពុងអនុវត្តធ្វើកិច្ចការនេះ ហើយបន្តបម្រើសង្រ្គោះប្រជាពលរដ្ឋឲ្យបានទាន់ពេលវេលា។
ក្នុងឱកាសនោះទេសរដ្ឋមន្រ្តី គន់ គីម បានអនុញ្ញាតឲ្យលោកមេឃុំ សហគមន៍ ប្រធានមន្ទីរជំនាញពាក់ព័ន្ធឡើងរាយការណ៍ ជូនអង្គប្រជុំជាក់ស្តែងនៅតាមូលដ្ឋានរបស់ខ្លួន និងក្នុងខេត្តទាំងមូលដើម្បីធ្វើរបាយការណ៍ជូនទៅថ្នាក់ជាតិ។
ទេសរដ្ឋមន្រ្តី គន់ គីម បានបញ្ជាក់ថា គោលបំណង នៃកិច្ចប្រជុំនាពេលនេះ គឺយើងក្តាប់ឲ្យបានរាល់ព័ត៌មានផ្សេងៗ ពិសេសការងាគ្រប់គ្រងគ្រោះមហន្តរាយ ហើយត្រូវត្រៀមកម្លាំងអន្តរាគមន៍ ជួយសង្រ្គោះ មានសំភារៈ និងស្បៀនៅពេលមានគ្រោះមហន្តរាយកើតឡើងភ្លាមៗនៅមូលដ្ឋាន។
ទេសរដ្ឋមន្រ្តីបានបន្តថា ក្នុងនាមគណ:កម្មាធិការជាតិគ្រប់គ្រងគ្រោះមហន្តរាយ ដែលមានសម្តេចតេជោនាយករដ្ឋមន្រ្តី ហ៊ុន សែន ជាប្រធាន និងក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានសមាគមន៍កាកបាទក្រហមកម្ពុជា ដែលតែងតែយកចិត្តទុកដាក់គិតគូពីសុខទុក្ខប្រជាពលរដ្ឋរហូតមក និងក្នុងនាមលោកជាអនុប្រធានទី១ នៃគណ:កម្មាធិការជាតិគ្រប់គ្រងគ្រោះមហន្តរាយ បានជម្រុញឲ្យមន្រ្តីជំនាញពាក់ព័ន្ធទាំងអស់ ដែលមានលោកអភិបាលខេត្ត ជាប្រធានកិត្តិយសស្រាប់ ត្រូវបន្តយកចិត្តទុកដាក់និងសហការគ្នាធ្វើការងារនេះឲ្យមានប្រសិទ្ធភាពខ្ពស់៕
