ឯកឧត្តម ផៃ ស៊ីផាន៖ រហូតមកដល់ពេលនេះ ដីកងទ័ពរបស់កម្ពុជា មិនមានការវិនិយោគ ឲ្យប្រទេសណាមួយឡើយ
រាជធានីភ្នំពេញ៖ការលើកឡើងបែបនេះក្នុងឱកាសដែលឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា និងនាយឧត្តមសេនីយ៍ ឈុំ សុជាត អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បាននាំអ្នកសារព័ត៌មានជាតិ និងអន្តរជាតិជិត១០០នាក់ ចុះបំពេញទស្សនកិច្ច ស្វែងយល់ការពិត នៅមូលដ្ឋានកងទ័ពជើងទឹករាម ខេត្តព្រះសីហនុ នៅថ្ងៃទី២៦ ខែកក្កដា ឆ្នាំ២០១៩ ក្រោយសារព័ត៌មានបរទេស បានផ្សាយថា កម្ពុជា-ចិន ចុះហត្ថលេខាដោយសម្ងាត់ ឲ្យបោះមូលដ្ឋាន យោធាចិន។
តាមព័ត៌មានទទួលបានក្រៅពីអ្នកសារព័ត៌មានជាតិជាច្រើននាក់ក៏នៅមានអ្នកសារព័ត៌មានអន្តរជាតិសំខាន់ៗរួមមាន AP, Reuters, VOA, Cambodia China Times, AFP, Xinhua, Cambodia China Friendship Radio និង Japanese TV ចូលរួមផងដែរ។
តាមមន្ត្រីជាន់ខ្ពស់ក្រសួងការពារជាតិឲ្យដឹងថា នេះជាការចុះពិនិត្យជាក់ស្តែងរបស់អ្នកសារព័ត៌មាន ហើយប្រការសំខាន់នោះគឺឲ្យអ្នកសារព័ត៌មានឃើញនឹងភ្នែកតែម្តង តើតំបន់នោះមានកងទ័ពចិនដូចសារព័ត៌មានអន្តរជាតិខ្លះចុះផ្សាយដែរឬទេ? ហើយបន្ទាប់ពីការពិនិត្យជាក់ស្តែងរួចហើយ តើពួកគេនឹង សរសេរផ្សព្វផ្សាយយ៉ាងម៉េចទៀត ? តើគេសរសេរព័ត៌មានប្រឌិតខុសការពិតទៀតឬយ៉ាងណា ? ៕
