សាខាកាកបាទក្រហមកម្ពុជា ខេត្តកោះកុង ចុះសួរសុខទុក្ខ និងនាំយកអំណោយមនុស្សធម៌ ជួយឧបត្តម្ភដល់ គ្រួសារប្រជាពលរដ្ឋក្រីក្រ មានជំងឺធ្ងន់ធ្ងរ
ខេត្តកោះកុង៖នៅថ្ងៃព្រហស្បត្តិ៍ ៩រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី ២៥ ខែកក្កដា ឆ្នាំ២០១៩ លោកជំទាវ មិថុនា ភូថង ប្រធានគណៈកម្មាធិការសាខាកាកបាទក្រហមកម្ពុជា ខេត្តកោះកុង បានចាត់អោយ លោក ឈួន យ៉ាដា នាយកសាខា សហការជាមួយក្រុមគ្រូពេទ្យផ្នែកសង្គ្រោះបន្ទាន់ នៃមន្ទីរពេទ្យបង្អែកខេត្តកោះកុង ចុះសាកសួរសុខទុក្ខ និងនាំយកអំណោយមនុស្សធម៌ ទៅជួយឧបត្តម្ភជូនដល់ គ្រួសារប្រជាពលរដ្ឋក្រីក្រ ដែលមានប្រពន្ធឈ្មោះ ស៊ុន ហេង អាយុ ៥៨ ឆ្នាំ មានជំងឺធ្ងន់ធ្ងរ កំពុងសម្រាកនៅលើគ្រែ ព្រមទាំងមានកូនស្រីចំនួន២នាក់នៅក្នុងបន្ទុក រស់នៅភូមិស្ទឹងវែង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង បច្ចុប្បន្នកំពុងសម្រាកព្យាបាលជម្ងឺនៅមន្ទីរពេទ្យបង្អែកខេត្តកោះកុង។
អំណោយមនុស្សធម៌ ដែលបាននាំយកមកផ្តល់ជូនរួមមាន៖មីម៉ាម៉ា១កេស,ទឹកសុទ្ធឳរ៉ាល់១កេស,ទឹកដោះគោឆៅ១ឡូ,ទឹកផ្លែឈើស្រស់១២កំប៉ុង ទឹកដោះគោខាប់៤កំប៉ុង,ត្រីខ១០កំប៉ុងអាវយឺត២ ព្រមទាំងថវិកាចំនួន ១៥២,៥០០រៀលផងដែរ។
ទន្ទឹមនឹងការពាំនាំនូវសេចក្តីផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់គ្រួសារលោកពូ ស៊ុន ហេង, លោកនាយកសាខា ក៏បានលើកទឹកចិត្ដដល់លោកពូ ក៏ដូចជាក្រុមគ្រួសារ សូមកុំអស់សង្ឃឹមបន្តខិតខំមើលថែទាំ ព្យាបាលជម្ងឺ ដោយស្តាប់តាមការណែនាំរបស់គ្រូពេទ្យ ដើម្បីឆាប់បានជាសះស្បើយ៕