ឃាត់ខ្លួនជនជាតិចិន១៥០នាក់ នៅក្នុងការ៉ាអូខេ “អូបាម៉ា” ខេត្តព្រះសីហនុ ពាក់ពន្ឋ័ករណី គ្រឿងញៀន
ខេត្តព្រះសីហនុ៖កម្លាំងសមត្ថកិច្ចខេត្តព្រះសីហនុ ក្រោមការដឹកនាំផ្ទាល់ពីឯកឧត្ដម គួច ចំរើន អភិបាល នៃគណៈអភិបាលខេត្តព្រះសីហនុ និងមានការចូលរួមពីព្រះរាជអាជ្ញាអមសាលាដំបូងខេត្ត ស្នងការនគរបាលខេត្ត និងកងកម្លាំងជាច្រើន បានចុះប្រតិបត្តិការបង្ក្រាបករណីគ្រឿងញៀនទ្រង់ទ្រាយធំ នៅក្នុងការ៉ាអូខេ “អូបាម៉ា” ដោយឃាត់ខ្លួនជនជាតិចិនបានចំនួន១៥០នាក់។
សូមជំរាបដែរថា៖ការចុះប្រតិបត្តិការណ៍បង្ក្រាបនេះបានធ្វើឡើងនៅវេលាម៉ោង៣:០០នាទីទៀបភ្លឺ ថ្ងៃទី២៥ ខែកក្កដា ឆ្នាំ២០១៩ ស្ថិតក្នុងក្រុម១៥ ភូមិ៣ សង្កាត់លេខ៤ ក្រុងព្រះសីហនុ ខេត្តព្រះសីហនុ។
បើតាមលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឱ្យដឹងថា ក្នុងប្រតិបត្តិការបង្ក្រាបករណីគ្រឿងញៀនទ្រង់ទ្រាយធំ នៅក្នុងការ៉ាអូខេ “អូបាម៉ា” កម្លាំងនគរបាល បានឃាត់ខ្លួនមនុស្សចំនួន ១៥០នាក់ ស្រី ៤៨នាក់ ជនជាតិចិន (កំពុងប្រើប្រាស់គ្រឿងញៀនតាមបន្ទប់)។
ក្រោយពីបង្ក្រាប់កម្លាំងសមត្ថកិច្ចដកហូតបាននូវវត្ថុតាងរួមមាន៖ជ្រុញសម្រាប់ប្រើគ្រឿងញៀន ចំនួន៣៥ជ្រុញ និងគ្រឿងញៀនមួយចំនួនប្រភេទ Ketamin។
បច្ចុប្បន្ន ជនសង្ស័យទាំងអស់ កំពុងឃាត់ខ្លួនបណ្តោះអាសន្ននៅស្នងការដ្ឋាន ដើម្បីសាកសួរយកចម្លើយ និងកសាងសំណុំរឿងចាត់ការតាមនីតិវិធី៕
