ACU បញ្ជូនមន្ត្រីនគបាល៣នាក់ ទៅកាន់តុលាការជាថ្មីម្តងទៀត ពាក់ព័ន្ធករណីរត់ការអន្ដរាគមន៍ ដោះលែងឧក្រិដ្ឋជនចិនចំនួន១៨នាក់
រាជធានីភ្នំពេញ៖មន្ត្រីនគបាលចំនួន០៣នាក់ ដែលពាក់ព័ន្ធទៅនឹងករណីរត់ការអន្ដរាគមន៍ ដោះ លែងឧក្រិដ្ឋជនចិនចំនួន១៨នាក់ ត្រូវបានអង្គភាពប្រឆាំងអំពើពុករលួយ (ACU) បានបញ្ជូន ទៅកាន់តុលាការជាថ្មីម្តងទៀតហើយនៅថ្ងៃទី២៤ ខែកក្កដា ឆ្នាំ២០១៩នេះ។
បើតាមនគរបាលជាន់ខ្ពស់បានអះអាងថា ជនជាតិចិនចំនួន១៨នាក់ ដែលមន្ត្រីនគរបាលទាំង៣រូប រត់ការឱ្យដោះលែងនេះ ត្រូវកម្លាំងសមត្ថកិច្ចខេត្តកំពង់ស្ពឺ បង្ក្រាបបានកាលពីថ្ងៃទី១៨ ខែកក្កដា ឆ្នាំ២០១៩ ពាក់ព័ន្ធករណីជំរិតទារប្រាក់ តាមប្រព័ន្ធអ៊ីនធឺណេត។ការឃាត់ខ្លួនឧក្រិដ្ឋជនចិន មន្ដ្រីនគរបាលទាំង៣នាក់នោះ បានចេញមុខរត់ការដោះលែងរហូតដឹងដល់ថ្នាក់ដឹកនាំ ទើបឈានទៅការចាត់វិធានការ តាមផ្លូវច្បាប់តែម្តង។
សូមបញ្ជាក់ដែរថា៖មន្ដ្រីនគរបាលទាំង៣រូបនោះ ធ្លាប់ត្រូវបានសមត្ថកិច្ចបញ្ជូនទៅតុលាការម្តងរួចទៅហើយកាលពីថ្ងៃទី២១ ខែកក្កដា ឆ្នាំ២០១៩ ក្នុងនោះមាន២នាក់ ជាមន្ត្រីនៅអគ្គនាយកដ្ឋាន អត្តសញ្ញាណកម្ម (ឋានន្ដរស័ក្ដិ ឧត្តមសេនីយ៍ និងវរសេនីយ៍ត្រី) និងម្នាក់ទៀតនៅការិយាល័យស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍។ប៉ុន្តែទោះជាយ៉ាងនេះក្តី ទាំងសមត្ថកិច្ច និងតុលាការ នៅមិនទាន់ហ៊ានបង្ហើបអំពីឈ្មោះអ្នកទាំងនេះនៅឡើយទេ៕
