គណៈបញ្ជាការឯកភាព រដ្ឋបាលក្រុង បានចុះរុះរើរបង ដែលធ្វើរំលោភចូលដីសាធារណៈ ចំនួនពីរខ្សែ នៅសង្កាត់សាលាកំរើក
ខេត្តសៀមរាប៖ដោយសំណូមពររបស់បងប្អូនប្រជាពលរដ្ឋ ដែលរស់នៅក្នុងភូមិតាវៀនចំនួន៣០០គ្រួសារ និងតាមការស្នើសុំរបស់សាលាសង្កាត់សាលាកំរើក នាថ្ងៃទី០២ ខែកក្ដដា ឆ្នាំ២០១៩ កម្លាំងគណៈបញ្ជាការឯកភាពរដ្ឋបាលក្រុង ក្រោមការដឹកនាំរបស់លោក នួន ពុទ្ធារ៉ា អភិបាលក្រុង ក្រុមការងារ បានចុះអនុវត្តរុះរើរបងដែលបានសាងសង់ រំលោភដីចំណីដងផ្លូវសាធារណៈ ស្ថិតក្នុងភូមិតាវៀន សង្កាត់សាលាកំរើក ក្រុង ខេត្តសៀមរាប ដែលធ្វើឲ្យប៉ះពាល់ប្រយោជន៍រួម របស់បងប្អូនប្រជាពលរដ្ឋ សម្រាប់ធ្វើដំណើរឆ្លងកាត់ជាសាធារណៈ។
សូមជំរាបដែរថា៖ការវាយរបងដែលបានរំលោភលើដីចំណីផ្លូវនេះ មានពីរខ្សែមួយខ្សែត្រូវពង្រីកទំហំ ៦ម៉ែត្រ មួយខ្សែតភ្ជាប់ពីផ្លូវ៦ម៉ែត្រ មកពេទ្យនាគទេពកែងផ្លូវផ្សារលើ ត្រូវពង្រីក៣ម៉ែត្រ ការពង្រីកផ្លូវនេះ គឺអោយស្របទៅតាមជើងម៉ែត្រ ដែលគណៈកម្មការដ្ឋបាលបានសម្រេច ដើម្បីបម្រើជាផលប្រយោជន៍រួមរបស់ជាសាធរណៈ។
ទន្ទឹមនឹងនេះអាជ្ញាធរខេត្ត បានអំពាវនាវដល់បងប្អូនប្រជាពលរដ្ឋទាំងអស់ មុននឹងសាងសង់ ត្រូវសុំច្បាប់អនុញ្ញាត ពីអាជ្ញាធរពាក់ព័ន្ធជាមុន ជៀសវាងមានការសាងសង់ខុសបច្ចេកទេស ដែលធ្វើអោយខាតបង់ប្រយោជន៍របស់បងប្អូន៕