ឯកឧត្តមអភិបាល ខេត្តព្រះសីហនុ ណែនាំឱ្យអាជីវករទាំងអស់ ចូលរួមថែរក្សាបរិស្ថាន អនាម័យ ជាពិសេសត្រូវទុកដាក់កាកសំណល់ ឱ្យបានត្រឹមត្រូវ
ខេត្តព្រះសីហនុ៖ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានណែនាំទៅដល់អាជីវករលក់ដូរ នៅតាមបណ្តោយឆ្នេរអូរឈេីទាលចំនួន៤៤គ្រួសារ ស្ថិតក្នុងសង្កាត់លេខ៤ ក្រុង ខេត្តព្រះសីហនុ ឲ្យចូលរួមជាមួយអាជ្ញាធរក្រុង ខេត្ត រៀបចំកែលម្អប្រព័ន្ធលូនៅតាមទីតាំងរបស់ខ្លួន ចូលរួមថែរក្សាបរិស្ថាន អនាម័យ ជាពិសេសត្រូវទុកដាក់កាកសំណល់ឱ្យបានត្រឹមត្រូវ ដើម្បីចូលរួមលើកកម្ពស់សុខមាលភាព សោភ័ណភាព និងកិត្យានុភាពទីក្រុងទេសចរណ៍។
ឯកឧត្តមមានប្រសាសន៍ណែនាំបែបនេះ ក្នុងឱកាសដែលឯកឧត្តម អនុញ្ញាតឱ្យអាជីវករទាំងនោះសំណេះសំណាល និងពិភាក្សាការងារ នៅសាលាខេត្តព្រះសីហនុ កាលពីរសៀលថ្ងៃអង្គារ ៧រោជ ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែកក្កដា ឆ្នាំ២០១៩ ។
ឯកឧត្តមអភិបាលខេត្តបានបញ្ជាក់ថា ចំពោះការសាងសង់តូបលក់ដូរ នៅតាមបណ្តោយឆ្នេរអូរឈើទាល យើងត្រូវសាងសង់អនុវត្តតាមគំរូប្លង់មេ ស្តង់ដារដែលបានកំណត់ ដើម្បីរក្សាសោភ័ណភាព បរិស្ថាន និងបទដ្ឋានបច្ចេកទេស កាន់តែល្អប្រសើរថែមទៀត ៕