ឯកឧត្តមទេសរដ្ឋមន្ត្រី ស៊ុន ចាន់ថុល ដាក់ស្ថានីយជញ្ជីង ថ្លឹងរថយន្តមួយបន្ថែមទៀត នៅលើផ្លូវជាតិលេខ៦២ ដើម្បីទប់ស្កាត់ការដឹកលើសទម្ងន់
ខេត្តព្រះវិហារ៖នាព្រឹកថ្ងៃអង្គារ៍ ៧រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៣ ខែកក្កដា ឆ្នាំ២០១៩នេះ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចុះជួបសំណេះសំណាលជាមួយមន្ត្រីមន្ទីរសាធារណការ និងដឹកជញ្ជូនខេត្តព្រះវិហារ។
ក្នុងកិច្ចសំណេះសំណាលនេះ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានលើកឡើងនូវកង្វល់ជុំវិញការដឹកជញ្ជូនលើសទម្ងន់នៅក្នុងភូមិសាស្ត្រខេត្តព្រះវិហារ ជាពិសេសនៅលើផ្លូវជាតិលេខ៦២តែម្តង ដែលជាបញ្ហាប្រឈមមួយនាំឱ្យផ្លូវនេះរងការខូចខាត។លោកបានស្នើឯកឧត្តមទេសរដ្ឋមន្ត្រី ស៊ុន ចាន់ថុល ឱ្យដំឡើងស្ថានីយជញ្ជីងថ្លឹងមួយទៀតនៅលើផ្លូវជាតិលេខ៦២ នៅព្រំប្រទល់ខេត្តព្រះវិហារ និងកំពង់ធំ ដើម្បីទប់ស្កាត់ការដឹកលើសទម្ងន់នេះ។
ក្នុងនោះឯកឧត្តមទេសរដ្ឋមន្ត្រី ស៊ុន ចាន់ថុល ក៏បានឯកភាពទៅលើសំណើនេះ ហើយក៏បានណែនាំឱ្យលោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន ដែលមានភារកិច្ចទទួលខុសត្រូវលើស្ថានីយជញ្ជីង និងការងារដឹកលើសទម្ងន់ចាត់ចែងរៀបចំដំឡើងស្ថានីយជញ្ជីងថ្លឹងរថយន្តមួយបន្ថែមទៀត នៅលើផ្លូវជាតិលេខ៦២ នៅព្រំប្រទល់ខេត្តព្រះវិហារ និងកំពង់ធំ ដើម្បីទប់ស្កាត់ការដឹកលើសទម្ងន់។
ក្នុងឱកាសនោះឯកឧត្តមទេសរដ្ឋមន្ត្រី ស៊ុន ចាន់ថុល ក៏បានណែនាំឱ្យមានការយកចិត្តទុកដាក់លើការដឹកលើសទម្ងន់នេះផងដែរ។ការដឹកលើសទម្ងន់នេះបំផ្លាញផ្លូវខ្លាំងណាស់។ជាមួយគ្នានោះដែរឯកឧត្តមក៏បានលើកការគណនាតាមរូបមន្តមកបង្ហាញផងដែរថា ក្នុងរថយន្តមួយគ្រឿងដឹកលើសទម្ងន់១០តោន គឺស្មើនឹងរថយន្ត១ម៉ឺនគ្រឿងធ្វើដំណើរលើផ្លូវនោះ ហើយបើរថយន្តមួយគ្រឿងដឹកលើសទម្ងន់៣០តោន គឺស្មើនឹងរថយន្តប្រមាណ៨១ម៉ឺនគ្រឿងបើកលើផ្លូវនោះ៕
