រថយន្តពីរគ្រឿងព្រលះគ្នា នៅលើទ្រូងផ្លូវរួចជ្រុល ទៅបុកផ្ទះប្រជាពលរដ្ឋ បង្កការភ្ញាក់ផ្អើលទាំងយប់
ខេត្តកំពត៖មានភាពភ្ញាក់ផ្អើលទាំងយប់ ខណៈមានរថយន្តពីរគ្រឿង បានរេចង្កូចបុកគ្នាទាំងកណ្តាលយប់ រួចជ្រុលទៅព្រលះផ្ទះប្រជាពលរដ្ឋដែលនៅជាប់ចិញ្ចើមផ្លូវ។
ហេតុការណ៍នេះបានកើតឡើង កាលពីវេលាម៉ោង២២ និង០៥នាទីយប់ ថ្ងៃទី០១ ខែកក្កដា ឆ្នាំ២០១៩ ត្រង់ចំណុចមុខវត្តកំពត ស្ថិតក្នុងភូមិតាដិប សង្កាត់អណ្តូងខ្មែរ ក្រុងកំពត ខេត្តកំពត លើកំណាត់ផ្លូវជាតិលេខ៣ កំពត-វាលរេញ។
តាមប្រភពព័ត៌មានពីសមត្ថកិច្ចក្រុងបានឱ្យដឹងថា មុនដំបូងគេឃើញរថយន្តម៉ាកកូរ៉ូឡា មួយគ្រឿងបើកមកពីជើងទៅត្បូង ពាក់ស្លាកលេខ ភ្នំពេញ 2H-7991 បើកបរដោយឈ្មោះ ជឹម រដ្ឋា ភេទប្រុស អាយុ៣២ឆ្នាំ មានទីលំនៅភូមិឈើទាលគោល ឃុំគូស ស្រុកត្រាំកក់ ខេត្តតាកែវ ស្រាប់តែមកដល់ចំណុចកើតហេតុរថយន្តនោះ ក៏រេចង្កូតទៅបុកគ្នាជាមួយរថយន្តមួយគ្រឿងទៀតដែលពាក់ស្លាកលេខ ភ្នំពេញ 2D-5211(អ្នកបើកបរអត់ស្គាល់អត្តសញ្ញាណ) រួចរថយន្តម៉ាកកូរូឡាក៏ជ្រុលទៅបុកផ្ទះប្រជាពលរដ្ឋ ដែលម្ចាស់ផ្ទះឈ្មោះ ឯក ភារុណ ភេទប្រុស អាយុ៥០ឆ្នាំរងការខូចខាតតែម្តង។
បច្ចុប្បន្នមធ្យោបាយពាក់ព័ន្ធ ត្រូវសមត្ថកិច្ចនាំយកទៅរក្សាទុក នៅក្នុងអធិការក្រុងកំពត សម្រាប់ដោះស្រាយគ្នានាពេលក្រោយ៕